#Ҳаёт_давом_этади

Айни пайтда Фарғона вилоятида саноат, қурилиш, маиший ва коммунал хизмат, савдо ва умумий овқатланиш, транспорт, қишлоқ хўжалиги ва бошқа соҳаларда 30 мингдан ортиқ юридик шахс фаолият кўрсатмоқда.

Жорий йилнинг май ойи ҳолатига кўра вилоятдаги юридик шахс мақомига эга бўлган солиқ тўловчиларнинг учдан бир қисми, яъни 11621 таси саноат корхоналари ҳиссасига тўғри келмоқда.

Саноат, қурилиш, савдо, умумий овқатланиш, транспорт, қишлоқ хўжалиги ва бошқа соҳаларда фаолият юритаётган ушбу субъектларда қарийб 366 минг нафар маҳаллий аҳоли бандлиги таъминланган.

Шифер маҳсулотлари ишлаб чиқарувчи “Quvasoyshifer Hrizotil” МЧЖда карантин даврида ишлаб чиқариш жараёни барқарор давом этмоқда. 2018 йилда ташкил этилган мазкур корхонадаги мавжуд 300 дан зиёд иш ўрни тўлиқ сақлаб қолинди. Бу ерда ишчилар карантин қоидаларига тўлиқ риоя қилишлари учун барча зарур шароитлар яратиб берилган.

Корхонада жорий йилнинг январь-апрель ойларида 13,9 миллиард сўмлик маҳсулот ишлаб чиқарилди. Жамият томонидан 2020 йилнинг I чорагида 553,3 миллион сўм, апрель ойида эса 107 миллион сўм миқдоридаги солиқлар ўз вақтида тўланди.

Қувасой шаҳрида жойлашган яна бир йирик корхона “Қувасойцемент” АЖда ҳам айни пайтда иш жуда қизғин. Қурилиш мавсуми бошлангач, цемент хом ашёсига бўлган талаб янада ортган.

Корхонада жорий йилнинг январь-февраль ойларида қарийб 30 миллиард сўмлик маҳсулот ишлаб чиқарилган бўлса, март ва апрель ойларида бу рақамлар 81,4 миллиард сўмни ташкил этди. Ушбу рақамлар ҳам корхонада ишлар авжида эканлигидан далолат беради.

1276 нафар ишчи-ходим меҳнат қилаётган корхонада карантин даврида ишчилар саломатлигини асраш мақсадида ҳар куни иш ўринларини дезинфекциялаш, ходимларнинг ҳароратини ўлчаш, уларни ниқоб, қўлқоп ва антисептик воситалар билан таъминлаш йўлга қўйилган.

“Қувасойцемент” АЖда ишлаб чиқариш жараёни бир маромда давом этиши билан бирга давлат бюджетига белгиланган солиқлар ўз вақтида тўлаб борилмоқда. Бинобарин, жорий йилнинг I чорагида 12,9 миллиард сўм, апрель ойида эса 5,6 миллиард сўм миқдорида солиқлар тўланди.

Айни кунлардаги синовли кунларда Қувасой шаҳрида жойлашган “Қувасойцемент” АЖ ва “Quvasoyshifer Hrizotil” МЧЖ каби корхоналардаги узлуксиз ишлаб чиқариш жараёни биринчи навбатда аҳоли бандлигини таъминлайди, пировардида мамлакатимиз иқтисодиёти барқарорлигига хизмат қилади.

Фарғона вилояти ДСБ

Матбуот хизмати