Давлат солиқ қўмитаси ташаббуси билан солиқ тўловчилар учун “Товарлар (ишлар, хизматлар)нинг ягона электрон классификатори: ЭҲФ даги янги устунлар – МХИК, штрих-кодлар” мавзусида онлайн-семинар ташкил этилди. ZOOM платформаси орқали ўтказилган семинар 100 дан зиёд иштирокчини қамраб олди. 

 Қонунчилик асосида

Ўзбекистон Республикаси Президентининг “Яширин иқтисодиётни қисқартириш ва солиқ органлари фаолияти самарадорлигини ошириш бўйича ташкилий чора-тадбирлар тўғрисида”ги ПФ6098-сонли Фармони билан яқин йилларга мўлжалланган “йўл харитаси” тасдиқланди. Ундаги мавжуд 35 банднинг ҳар бири вазирлик ва идораларнинг яширин иқтисодиёт ва коррупцияга қарши курашиш самарадорлигини оширишга, шунингдек солиқ ва божхона маъмуриятини такомиллаштиришга қаратилган. Улардан бири 2020 йил ноябрь ойида республикада сотиладиган товар ва хизматларни мажбурий идентификация қилиш тартибини жорий этиш билан боғлиқ.

Ўзбекистон Республикаси ҳудудида сотиладиган маҳсулотларнинг Ягона электрон каталогини жорий этиш чора-тадбирлари тўғрисидаги тегишли қарор лойиҳаси Норматив-ҳуқуқий ҳужжатлар лойиҳалари муҳокамаси порталида жамоатчилик муҳокамасига тақдим этилди. Вазифа жуда содда – тадбиркорлик субъектлари ўртасида тизимлаштирилган ва мувофиқлаштирилган электрон маълумот алмашинувини таъминлаш.

Шу билан бирга, ҳозирги вақтда ушбу тартибнинг синовдан ўтказилиши, кейинчалик ундан фойдаланиш мажбурияти талаб этилган даврда саволлар ва тушунмовчиликларни минималлаштиришга имкон беради.

 Афзаллиги нимада?

Таклиф этилаётган янгиликларга кўра, электрон ҳисобварақларга иккита янги устун қўшилди (маҳсулот ва хизматларнинг идентификация кодларини ҳамда товар ва хизматларнинг штрих-кодини киритиш учун). Шу муносабат билан, ноябрь ойи учун ЭҲФ тақдим этиш муддати 18 декабрга қадар узайтирилди. Классификатор синов режимида ишга туширилди. Бу электрон ҳисобварақ-фактураларни тўлдиришда хатолар, ноаниқликлар ва бошқа муаммоларнинг олдини олади.

Ушбу янгилик солиқ ва божхона маъмуриятчилигини такомиллаштиришга қаратилган бўлиб, муҳим иқтисодий аҳамиятга эга. Бу мамлакат ичида сотиладиган маҳсулотларнинг ишончли ва аниқ ҳисобини юритишга имкон беради. Ҳозирги вақтда савдо айланмаси тўғрисида батафсил маълумотлар мавжуд эмас. Ушбу янгиликнинг босқичма-босқич татбиқ этилиши “Йирик маълумотлар” (Big data) каби замонавий рақамли технологиялардан кенг фойдаланишга, тўпланган маълумотларни таҳлил қилишга ёрдам беради. Келажакда бундай ахборот базаси савдо ва ишлаб чиқаришдаги талаб ва таклифнинг маркетинг тадқиқотларида муҳим ёрдамчига айланади.

Юқорида келтирилган вазифаларни амалга ошириш Давлат солиқ қўмитасига юклатилган бўлиб, ҳозирги кунда товарлар (ишлар, хизматлар)нинг ягона электрон классификатори тажриба асосида босқичма-босқич жорий этилмоқда. Онлайн-семинар доирасида ДСҚ ва “Янги технологиялар” ИАМ мутахассислари томонидан tasnif.soliq.uz веб-портали бўйича батафсил маълумотлар, хусусан, маҳсулот ва хизматларнинг идентификация кодларидан (МХИК) босқичма-босқич фойдаланиш бўйича қўлланма тақдим этилди. 

Семинар иштиркочилари томонидан 50 дан зиёд саволлар берилди. Кимларнидир кодлар (МХИК) қизиқтирган – улар 1Cга интеграция қилинадими, онлайн-назорат-касса машиналарига ўрнатиш шартми? Яна бир саволлар тўплами товарлар ва хизматлар кодларини тўлиқ киритиш билан боғлиқ бўлди. Саволларга мутахассислар томонидан тўғридан-тўғри жавоб берилди. Семинар давомида муҳокама қилинган муҳим масалалар юзасидан ДСҚ расмий манбалари орқали алоҳида шарҳлар тақдим этилади.

ДСҚ Матбуот хизмати