Ўзбекистон Республикаси Вазирлар Маҳкамаси ҳузуридаги Солиқ қўмитаси

Солиқ кодексига ўзгартириш киритилди

07/10/2020

2020 йил 5 октябрда “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикасининг ЎРҚ-640-сон Қонуни қабул қилинди. (https://lex.uz/docs/5029489)

Ҳужжатда Ўзбекистон Республикаси Солиқ кодексига жисмоний шахсларнинг ер солиғи бўйича имтиёзлари тўғрисида ўзгартириш киритиш назарда тутилган. Солиқ кодексининг 436-моддасида ушбу солиқ имтиёзи берилган ижтимоий ҳимояга муҳтож аҳоли қатлами тоифалари келтирилган. Энди Солиқ кодексининг 436-моддаси биринчи қисмининг 5-банди қуйидаги янги таҳрирда баён этилмоқда:

«5) боқувчисини йўқотган кўп болали оилалар. Ота ва онадан бири ёхуд ота-она вафот этган кўп болали оилалар солиқ солиш мақсадида боқувчисини йўқотган кўп болали оилалардир. Ушбу имтиёз Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси туман (шаҳар) бўлимининг маълумотномаси асосида берилади».

Тўрт нафар ва ундан ортиқ ўн саккиз ёшга тўлмаган боласи бўлган оилалар ер солиғидан озод этилади. Бунда, агар тўрт нафар ва ундан ортиқ болаларидан бир нафари ёки ундан кўпроғи таълимнинг кундузги шаклида (ўрта махсус ва профессионал, олий таълим) таълим ташкилотларида ўқиётган ҳамда йигирма икки ёшга тўлмаган бўлса, бу оила ҳам кўп болали оила деб ҳисобланади ва ер солиғи имтиёзидан фойдаланиш ҳуқуқига эга.

Ўзбекистон Республикасининг 640-сон Қонунига мувофиқ “қўп болали оила” атамасининг таърифи Ўзбекистон Республикасининг Оила кодексига киритилди. ( Оила кодекси, 4-1 модда)

ДСҚ Матбуот хизмати