Mobil ilova Oʻzbekiston aholisi orasida eng ommabop ilovaga aylandi. Bugungi kunda ilova foydalanuvchilari soni 7,5 mln nafardan ortdi. Bir kunda 800 ming martadan ortiq foydalanilmoqda. App Store va GooglePlay da doimiy ravishda eng koʻp yuklab olinadigan ilovalar oʻntaligida turadi.

Uydan chiqmang va navbat kutmang 

Keshbek, ijara shartnomalarini hisobga qoʻyish, soliqlarni toʻlash va oʻzini oʻzi band qilish kabi xizmatlar eng ommabop xizmatlar boʻlib qolmoqda.

2023-yilda ilova orqali 134 mlrd soʻmdan ortiq soliq toʻlangan boʻlsa, joriy yilning 7 oyida qariyb 191,5 mlrd soʻm soliq toʻlandi.

Jismoniy shaxslar mobil ilova orqali toʻlangan soliqni qaytarish uchun ariza berishlari mumkin. Ushbu xizmat ishga tushirilgandan beri, yaʼni 2023-yil dekabr oyidan bugungi kungacha 90 mingdan ortiq ariza kelib tushgan.

Joriy yilda soliq organlari bilan qayta aloqa tizimi ishga tushirildi. Mazkur tizim orqali sohaga oid savollarni 24/7 rejimida yuborish mumkin. Tizim soliq.uz veb-sayti va “Soliq” mobil ilovasiga joylashtirilgan. 1-avgust holatiga, sayt orqali 2,5 mingga yaqin, ilovadan qariyb 21 ming xabar kelib tushgan.

Zamon bilan hamnafas

Soliq qoʻmitasi soliq toʻlovchilar uchun sunʼiy intellekt bazasida yaratilgan Davr-On virtual yordamchisini ishga tushirdi, u ham soliq toʻlovchilarga 24/7 rejimida soliq va soliqqa tortish masalalarida maʼlumotlar hamda personal maslahatlar beradi. Davr-On bilan ilova orqali ham muloqot qilish mumkin.

Biznesingiz kaftdek namoyon

Yaqin vaqtgacha mobil ilova orqali faqat jismoniy shaxslarga xizmat koʻrsatilar edi. Joriy yil 1-avgustda ilovani yangi 2.0. versiyasi ishga tushirildi. Unda yuridik shaxslar shaxsiy kabinetining mobil versiyasi – “Soliq biznes” qoʻshildi. Bu 20-avgust – Tadbirkorlar kuniga ajoyib tuhfa boʻldi.

Xizmatdan korxona rahbari va bosh hisobchi foydalanishi mumkin. Buning uchun ulardan Face ID orqali roʻyxatdan oʻtish talab etiladi xolos.

Bunda tadbirkorlar real vaqt rejimida barqarorlik reytingidagi oʻrni, korxona haqidagi maʼlumotlar, xusuan, “DSB maʼmurchiligi” hamda “Mahallabay” tizimidagi mezonlar asosida soliq majburiyatlarining bajarilgan yoki bajarilmaganlik holati va ularni bartaraf etish boʻyicha tavsiyalarni koʻrib turadi.

Shuningdek, bank hisobraqamlarining toʻxtatilgan yoki toʻxtatilmaganligi, yuborilgan va kelib tushgan elektron hisobvaraq-faktura, elektron ishonchnoma va elektron shartnomalarning har bir holatini bilish mumkin.

Shaxsiy kabinetga yuborilgan talabnoma va boshqa yozishmalarning alohida boʻlimda joylashtirilishi tadbirkorlar uchun yana bir qulaylik boʻldi. Bu yerdan soliq organiga murojaat yuborish imkoniyati ham yaratilgan.

Biznes jarayonlarini va hisobchilar faoliyatini korxona rahbari bilan bir paytda taʼsischilar, biznes hamkorlar va boshqa ishonchli shaxslar ham kuzatib borishi mumkin. Buning uchun korxona rahbari kuzatuvchi rejimini faollashtirishi kifoya.

“Soliq biznes” xizmati biriktirilgan soliq inspektori bilan toʻgʻridan-toʻgʻri aloqa oʻrnatishga imkon beradi. Bunda koʻrsatilgan xizmatga salbiy yoki ijobiy baho berish mumkin. 

Shuningdek, ilovaning yangilangan versiyasida elektron tovar transport yuk xatlarini shakllantirish ham soddalashdi. Eng asosiysi endi haydovchilardan tovar transport yuk xatini tasdiqlash talab etilmaydi.

Jismoniy shaxslar uchun ham bir qator qulayliklar yaratildi. Soliq organlari va tegishli idoralar maʼlumotlar bazalarining integratsiyalashuvi hisobiga endi foydalanuvchilarning pasport yoki ID karta, haydovchilik guvohnomasi, taʼlim toʻgʻrisidagi maʼlumotlari va pensiya jamgʻarmasi mablagʻlari ham ilovada koʻrinadi.

Umid qilamizki, yuridik shaxslar uchun moʻljallangan mobil kabinet hisobchi va korxona rahbarlari uchun qoʻshimcha qulayliklar yaratib, soliq majburiyatlarini oʻz vaqtida, xato va kamchiliklarsiz bajarishga xizmat qilmoqda. 

Soliq organlari soliq toʻlovchilarga yangi va yaxshi xizmatlar yaratishda davom etadi.

Eslatib oʻtamiz, soliq mobil ilovasini faqat rasmiy manbalardan, yaʼni AppStore va GooglePlay platformalaridan yuklab oling va yangilab boring. Ilovada roʻyxatdan oʻtishda telefon raqamlaringizga SMS orqali yuborilgan tasdiqlash kodlarini hech kimga bermang. Aks holda firibgarlik qurboni boʻlishingiz mumkin.  

Soliq qoʻmitasi Matbuot xizmati