O‘zbekiston Respublikasi Vazirlar Mahkamasi huzuridagi Soliq qo‘mitasi

Солиқларни масофадан тўланг

21/10/2020

Инсофли солиқ тўловчилар солиқ тақвимининг барча саналаридан хабардор. Масалан: 15 октябрь жисмоний шахслар учун мол-мулк ва ер солиғи тўлашнинг охирги куни эди.

Аҳолига қулайлик яратиш мақсадида 2020 йилдан бошлаб ушбу солиқларни икки муддатда – 15 апрель ва 15 октябрга қадар тенг улушларда тўлаш назарда тутилган (Солиқ кодексининг 423 ва 440-моддалари).

(Ўзбекистон Республикаси Президентининг 2020 йил 19 мартдаги ПФ-5969-сонли Фармонига асосан мол-мулк ва ер солиқларини тўлов муддатини битта қилиб яъни 15 октябрга қадар узайтирилди)

Махсус ишлаб чиқилган SOLIQ мобил иловаси ва бошқа электрон тўлов тизимлари орқали масофадан туриб исталган вақтда тўловларни амалга оширишга имконият берилган бўлиб, ҳозирда тўловларни амалга оширган солиқ тўловчиларнинг 42 фоиздан зиёди ушбу тизимлар хизматларидан фойдаланмоқда.

SOLIQ мобил иловасида мол-мулк солиғи ва ер солиғини тўлаш бўйича босқичма-босқич қўлланма бу ерда.

20 октябрь ҳолатига фуқароларнинг 67 фоиздан ортиғи давлат олдидаги солиқ мажбуриятини бажарди. Ер солиғи ва мол-мулк солиғи тўловлари бўйича юқори кўрсаткич қайд этаётган энг яхши 5 ҳудуд:

Хоразм вилояти – 85,8%

Наманган вилояти – 77,1%

Навоий вилояти – 74,4%

Қорақалпоғистон Республикаси – 71,5%

Тошкент шаҳри – 71,3%

20 октябрь ҳолатига солиқ тўловчилар томонидан тўланган умумий тўлов миқдори – 1,4 трлн. сўм. Шунинг 560 млрд сўмдан ортиғи мол-мулк солиғи, 850 млрд сўмдан зиёди эса ер солиғи суммаси. Ушбу маблағлар маҳаллий (туман ва шаҳар) бюджетларга тушади ва ижтимоий объектларга, ободонлаштиришга, стратегик муҳим жойларни ривожлантиришга йўналтирилади.

Муҳим эслатма: жисмоний шахслар ҳисобланган солиқларни тўламаган тақдирда, 16 октябрдан бошлаб ҳар бир кечиктирилган кун учун пеня ҳисобланади.

ДСҚ Матбуот хизмати