Avval xabar qilinganidek, qo‘shilgan qiymat solig‘i (QQS) bo‘yicha soliq ma’muriyatchiligining takomillashtirilishi munosabati bilan yashirin iqtisodiyot ulushini kamaytirish maqsadida Davlat soliq qo‘mitasi tomonidan to‘lanishi kerak bo‘lgan QQS summasini kamaytirish tarzidagi huquqni suiiste’mol qilgan – «shubhali» soliq to‘lovchilar ro‘yxati tuzilgan.

Dastlabki ro‘yxatga ko‘ra «shubhali» soliq to‘lovchilar soni 396 tani tashkil etmoqda. Ushbu sub’ektlar o‘z faoliyati davomida qalbaki operatsiyalarni amalga oshirib, byudjetga to‘lanadigan soliq summalarini kamaytirganlar.

– Ushbu xo‘jalik yurituvchi sub’ektlar – «shubhali» soliq to‘lovchilar bilan moliyaviy operatsiyalarni amalga oshirib, qariyb 1 trillion so‘m miqdoridagi qo‘shilgan qiymat solig‘i summasini hisob (zachet)ga olgan holda byudjetga to‘lamagan korxonalardir, deydi Davlat soliq qo‘mitasi departamenti direktori Jahongir Abdiyev.

Byudjetga to‘lanmagan qo‘shilgan qiymat solig‘ining o‘rnini qoplash uchun mazkur 396 ta «shubhali» korxonalar va ularning deyarli 10 mingga yaqin biznes hamkorlarining shaxsiy kabinetlariga tegishli xabarnomalar yuborildi.

Agarda xo‘jalik yurituvchi sub’ektlar xabarnomani olganidan keyin 5 kun ichida aniqlashtirilgan soliq xisoboti taqdim qilsalar hamda xisoblangan soliq summalarini to‘lasa, huquqiy oqibatlar kelib chiqmasligi va mazkur ro‘yxatdan chiqarish imkoniyati paydo bo‘ladi.

Tadbirkorlik sub’ektlaridan yashirin iqtisodiyotga qarshi kurashda faol bo‘lish hamda «shubhali» korxonalar bilan hamkorlik qilmasliklarini so‘raymiz. «Shubhali» ro‘yxatga kiritilmaganligini DSQning rasmiy veb-saytidagi maxsus servis xizmati orqali tekshirish mumkin.

Ma’lumot uchun. Soliq nazorati o‘tkazilayotganda soliq organlari soliq to‘lovchilarning o‘z kontragentlari bilan bo‘lgan xo‘jalik operatsiyalarini quyidagi masalalar bo‘yicha o‘rganadilar:

- operatsiya (bitim)larning haqiqatda amalga oshirilganligi;

- operatsiya (bitim)larni to‘g‘ridan-to‘g‘ri kontragentlarning o‘zi yoki ularning pudratchilari yoki ularning tarkibiy bo‘linmalari tomonidan amalga oshirilganligi;

- bitimlarning tijorat maqsadiga muvofiqligi va to‘lanadigan soliqlar miqdorini kamaytirish shaklidagi asossiz soliq imtiyozlari olinmaganligi.

 DSQ Matbuot xizmati