Давлат солиқ қўмитаси томонидан “Солиқ идораси – тадбиркорга кўмакчи” шиори остида Тошкент вилоятининг Бўстонлиқ туманида ОАВ вакиллари учун пресс-тур ташкил этилди.

Кун тартибида солиқ тўловчиларни ҳисобга олишни соддалаштириш, савдо ва хизматлар кўрсатиш сифатини ошириш ҳамда аҳоли бандлигини таъминлашни Бўстонлиқ тажрибасида ўрганиш бўлди.

 Ўзбекистон Республикаси Вазирлар Маҳкамасининг 2020 йил 20 февралдаги 107-сонли қарори билан 2020 йил 1 майдан 2021 йил 1 майгача мазкур ҳудудда тажриба тариқасида солиқ солиш объектларини ҳисобга олиш ва солиқ маъмуриятчилигининг алоҳида тартиби жорий этилди.

 Моҳият нимада?

 Tошкент вилояти юқори сайёҳлик салоҳиятига эга минтақа. Маҳаллий ва чет эллик сайёҳлар учун оромбахш манзилларнинг катта қисми айнан Бўстонлиқ туманида жойлашган. Шу сабабли тажриба учун айнан мазкур туман танланган.

Тажриба даврида жисмоний шахслар томонидан ижарага бериладиган дам олиш уйлари, дала ҳовли ва яшаш учун мўлжалланган турар жойлар, шунингдек, сув транспорти, сув мотоцикллари, қорда юрадиган техника воситалари, квадрацикллар, параплан ва дельтапланлар, супа, сўри ва шунга ўхшаш дам олиш обеъктлари жисмоний шахсларнинг даромад манбаи сифатида рўйхатга олинди.

Бунинг учун Бўстонлиқ туманининг Ғазалкент шаҳри, “Дўстлик”, “Сижжак” ва “Новобод” маҳалла фуқаролар йиғини ҳудудларида 4 та солиқ таянч пункти ташкил этилди. Ушбу пунктларга махсус ўқув курсларида малака оширган 30 нафар солиқ хизмати ходимлари бириктирилди.

Солиқ таянч пунктларида фаолият юритадиган ходимлар қарорда кўрсатилган ва солиққа тортиладиган кўчар ёки кўчмас мулк объектларини ҳисобини юритади. Жисмоний шахслар ҳисобдан ўтиб, дам олиш объектларини махсус гувоҳнома асосида ижарага бермоқда. Мазкур гувоҳнома солиқ таянч пунктлари томонидан мулк эгаларига бепул тақдим этилди. Гувоҳноманинг мавжудлиги ижарачи фаолиятининг қонунийлигини билдиради.

 Ҳудуддаги барча инспекторлар онлайн ишлайдиган махсус қурилмалар билан таъминланган. Солиқларни тўлаш тизимини рақамлаштириш биринчи навбатда солиқ тўловчиларнинг эҳтиёж ва имкониятларига қаратилган. Механизм қанчалик қулай ва содда бўлса, ҳар бир фуқаро учун давлат олдидаги барча солиқ мажбуриятларини ўз вақтида бажариш шунчалик осон бўлади. “Солиқларни автоматлаштирилган йиғиш тизими” – “САЙТ” давлат солиқ қўмитасининг сўнгги ва муваффақиятли янгиликларидан биридир. “САЙТ” тизими солиқ инспекторига солиқларни мустақил равишда йиғиш ва бир вақтнинг ўзида амалга оширган ишларини қайд этиш имконини беради. Web диспетчерлик иловаси орқали инспекторнинг реал вақт режимида амалга оширган ишлари ҳам баҳолаб борилади.

Эслатиб ўтамиз: жисмоний шахслар учун даромад манбаи сифатида мол-мулкка солиқ солишнинг экспериментал тартиби тадбиркорлик субъекти сифатида давлат рўйхатидан ўтган ҳолда оилавий меҳмон уйлари ва айрим мол-мулк турларини ижарага бериш билан шуғулланадиган жисмоний шахсларга татбиқ этилмайди.

OROM.UZни танлаб, адашмайсиз Мазкур тажриба доирасида Давлат солиқ қўмитаси Тошкент вилоятининг Бўстонлиқ туманидаги дам олиш масканларини ижарага олиш тўғрисида ишончли маълумотларнинг янги хизмати – orom.uz – Ягона электрон платформасини ишга туширди.

 OROM.UZни танлаб, адашмайсиз

Мазкур тажриба доирасида Давлат солиқ қўмитаси Тошкент вилоятининг Бўстонлиқ туманидаги дам олиш масканларини ижарага олиш тўғрисида ишончли маълумотларнинг янги хизмати – orom.uz – Ягона электрон платформасини ишга туширди. 

Платформа географик рўйхатида солиқ солишнинг янги тартиби синовдан ўтказилаётган хушманзара ҳудудлар – Сижжак, Бўстонлиқ, Юсуфхона, Сойлиқ ва Дўстлик қўрғонлари кўрсатилган.

Ижарага берувчилар orom.uz сайтига ижара объектлари ҳақидаги маълумотларни бепул жойлаштиради. Мижозлар дам олиш объектини масофадан туриб танлаши, банд қилиши ва улар учун тўловни амалга ошириши мумкин. Тўлов амалга оширилгандан сўнг, дам олувчининг электрон почтасига банд қилинганлик ҳақида хабарнома юборилади. Дам олувчилар сайтда рўйхатдан ўтиб, объектларни танлаши ва банд қилиши, шунингдек, уларни турли мезонлар бўйича баҳолаб, шарҳлар қолдириши мумкин. Жисмоний шахслар янги тартиб туфайли қонуний равишда даромад келтирувчи фаолият билан шуғулланишлари мумкин.

Платформадаги барча маълумотлар ишончли. Объектларнинг orom.uz сайтида мавжудлиги улар фаолиятининг қонунийлигини билдиради.

Ҳозирги кунда orom.uz платформасида туризм хизматлари истеъмолчилари учун фойдали бўлган қўшимча маълумотларга эга 3700 дан ортиқ дам олиш объекти мавжуд. Унда объектларнинг тавсифи, фотосуратлари, харита бўйича жойлашуви (геолокация) ва ижара нархи кўрсатилган.

Муҳим! Aгар сиздан сайтда кўрсатилганидан фарқ қиладиган нархни тўлашингизни сўрашса, таклиф этилган дала ҳовли ёхуд бошқа объектнинг фотосурати ҳақиқий кўринишига мос келмаса, жойлардаги мавжуд солиқ таянч пунктларига мурожаат қилиш мумин.

 Янги тартиб рақамларда

Жорий йилнинг 22 сентябрь ҳолатига дала ҳовли ва айрим мол-мулк объектларини ижарага бериб даромад олаётган жами 4 375 та солиқ тўловчи ҳисобга олиниб, 4,7 млрд.сўм миқдорида солиқ ундирилди. Шундан, Ягона электрон платформада 3 744 та ижарачи рўйхатга олиниб,
улар 3 млрд. сўм даромад солиғи тўлади. Бу ўтган йилнинг мос даврига (1 282 та, 1197,3 млн. сўм) нисбатан деярли 3 баравар зиёд демакдир.

 Бу ўзгаришлар Tошкент вилоятида туристик хизматлар кўламини яхшилаш, истеъмолчилар ҳуқуқларини ҳимоя қилиш ва солиқ солинадиган объектларни ҳисобга олиш тартибини соддалаштиришга қаратилган.

Давлат солиқ хизмати – инсофли солиқ тўловчиларнинг ишончли ҳамкори! 

ДСҚ Матбуот хизмати