O'zbekiston Respublikasi Soliq qo'mitasi

Ютуқли чек ўйинлари иккинчи тиражи 19 августда ўтказилади

11/08/2020

Давлат солиқ қўмитаси онлайн назорат-касса машиналари (онлайн НКМ) ва виртуал касса ютуқли чек ўйинларининг иккинчи тиражи учун иштирокчиларни рўйхатга олишни давом эттирмоқда. Улар сони кундан кунга ортиб бормоқда.

Эслатиб ўтамиз, ютуқли ўйинларда иштирок этиш учун онлайн НКМ ёки виртуал касса билан жиҳозланган шохобчадан сотиб олинган маҳсулот (хизмат) учун QR кодли чек олиш лозим. Кейинги қадам – “SOLIQ” мобил иловаси ёрдамида чекнинг QR кодини сканер қилиш ёки 12 хонали фискал белгисини 1077 қисқа рақамига SMS тарзида юбориш.

Чек муваффақиятли рўйхатдан ўтказилгач, Сиз ютуқли ўйин иштирокчисига айланасиз.

Истеъмолчиларга қулайлик яратиш мақсадида, “SOLIQ” мобил иловасида смарт касса ўрнатилган шохобчалар бўйича қидирув (геолокация) функцияси яратилди. Шунингдек, ҳар бир савдо нуқтасининг кассасида Онлайн НКМ ёки виртуал касса мавжудлиги тўғрисидаги маълумот акс эттирилган махсус стикер ёпиштирилди.

Иккинчи тиражда қуйидаги ютуқлар ўйналади:

· 1 та Chevrolet Nexia 3 автомобили;

· 3 та телевизор;

· 3 та кир ювиш машинаси;

· 3 та кондицонер;

· 3 та газ плитаси;

· 3 та дазмол;

· 4 та велосипед.

Бунда ютуқ соҳиблари жисмоний шахслардан олинадиган даромад солиғи тўлашдан озод бўлади. Ютуқ билан бир қаторда, ушлаб қолинадиган ва бюджетга ўтказиладиган даромад солиғи миқдорида пул мукофоти тақдим этиш назарда тутилган.

Чекларни талаб қилинг, рўйхатдан ўтказинг, сақлаб қўйинг ва ютуқли ўйин иштирокчисига айланинг!

ДСҚ Матбуот хизмати