Soliq qoʻmitasi Raisining

korrupsiyaga qarshi kurashish boʻyicha

M U R O J A A T I

Tarixdan maʼlumki korrupsiyaning paydo boʻlishi insoniyatning uzoq oʻtmishiga borib taqaladi. Uzoq oʻtmishga ega boʻlgan bu illatni bartaraf etish ham ulkan jasorat va sadoqatni talab etadi.

Hurmatli Prezidentimiz tashabbusi bilan “Inson qadri uchun” tamoyili asosida amalga oshirilayotgan inson huquqlari va manfaatlarini soʻzsiz taʼminlash hamda faol fuqarolik jamiyatini shakllantirishga qaratilgan islohotlar doirasida barcha sohalarda korrupsiyaga qarshi murosasiz munosabatda boʻlish muhitini shakllantirish talab etiladi.

Buning uchun korrupsiyaning har qanday koʻrinishiga murosasiz munosabatda boʻlish soliq xizmati organlari tizimida har bir xodimning kundalik hayot tarziga aylanishi kerak. Halollik, vatanparvarlik va masʼuliyatni faoliyatining asosiy tamoyiliga aylantirgan holda, berilgan vazifalarni vijdonan, xolis va yuqori saviyada amalga oshirishi lozim.

Shu nuqtayi nazardan, tizimda korrupsiyaning oldini olish choralarini koʻrish, uni keltirib chiqarishi mumkin boʻlgan sabab va sharoitlarni barvaqt aniqlash va bartaraf etish boʻyicha samarali tizim shakllantirilmoqda.

Korrupsiyaga qarshi kurashish, uning oldini olish, korrupsiyaga qarshi xavf-xatarlarni baholashda ochiqlik va shaffoflikni taʼminlash, jarayonga ilgʻor mexanizmlarini joriy etish, bu borada huquqiy va institutsional bazani takomillashtirish soliq organining asosiy maqsadlari etib belgilangan.

Oʻtgan davrda avtomatlashtirish orqali soliq maʼmurchiligini toʻliq va oʻz vaqtida amalga oshirish, funksiyalar boʻyicha vertikal nazorat oʻrnatish, korrupsion holatlar yuzaga kelishini cheklash, maʼlumotlarning real vaqt rejimida va bexato shakllantirish yoʻnalishlarida tizimli ishlar amalga oshirildi.

Soliq toʻlovchilarni hisobga olishdan tortib, to soliq majburiyatini bajarishgacha boʻlgan jarayonlarning avtomatlashtirilishi soliq toʻlovchilar va soliq organlari oʻrtasidagi oʻzaro munosabatlarda inson omilini cheklab tizimni yanada shaffoflashishiga zamin yaratmoqda.

Umuman, bugungi kunda soliq toʻlovchilarga 50 dan ortiq interaktiv xizmatlar koʻrsatilmoqda. Soʻnggi bir yilda amaliyotga yana 9 ta yangi interaktiv xizmat tatbiq etildi.

Amalga oshirilgan ishlar natijasi oʻlaroq, Soliq qoʻmitasi 2021-yilda “ISO 37001:2016 korrupsiyaga qarshi kurashish menejmenti” xalqaro standartlarga muvofiqlik sertifikatini qoʻlga kiritdi.

Soliq organlari korrupsiyaga qarshi kurashish va korrupsiyaviy holatlarning barvaqt oldini olishda jamoatchilik nazoratiga tayanadi va fuqarolarning faolligi va tashabbuslarini qoʻllab-quvvatlaydi.

Soliq xizmati organlari xodimlarining korrupsiya va boshqa huquqbuzarlik holatlariga aloqadorligi yuzasidan maʼlumotlarga ega boʻlgan fuqarolar Soliq qoʻmitasining 71-244-98-98 raqamli Ishonch telefoni yoki dsq_anticorrupciya_bot telegram boti orqali toʻgʻridan-toʻgʻri murojaat yoʻllashi mumkin.

Soliq xizmati organlarida korrupsiyaning oldini olish choralarini koʻrish, kelib chiqish sabab va sharoitlarini barvaqt aniqlash va bartaraf etish borasidagi ishlar kelgusida ham izchillik bilan davom ettiriladi.

Shu oʻrinda tizimda mehnat qilayotgan har bir rahbar va xodimni korrupsiya holatlarining har qanday koʻrinishlariga nisbatan murosasiz munosabatda boʻlishga hamda oʻz xizmat vazifalarini halol va xolis bajarishga chaqiramiz.