Buxoro shahridagi to‘qimachilik mahsuloti ishlab chiqarishga mo‘ljallangan “EVER WHITE GROUP” korxonasi yaqinda barqarorlik reytingining yuqori “A” toifasiga (87 ball) kiruvchi tadbirkorlik sub’ektlaridan biriga aylandi. Bunga viloyat soliq boshqarmasining “korxonabay” ishlash asosida biriktirilgan xodimlarining soliq toʻlovchilar bilan yaqindan hamkorligi hamda shu orqali ulardagi kamchiliklarni bartaraf etishga qaratilgan chora-tadbirlari ijobiy samaralar berdi deyish mumkin.
Ushbu tadbirkorlik sub’ektiga biriktirilgan xodimlarning korxona rahbari hamda hisobchisi bilan navbatdagi uchrashuvi aynan shu mavzuda bo‘lganligi bejiz emas, negaki, ular avvalgi uchrashuvlarda soliq imtiyozlari va preferensiyalardan foydalanmoqchiliklarini bildirgan edilar. Shu bois, soliq xodimlari ularga barqarorlik reyting darajasini (“AAA” 100 ball) yanada yaxshilash yuzasidan kerakli maslahatlarini berdilar.
Ta’lim xizmatlarini ko‘rsatuvchi “Buxoro innovatsion ta’lim va tibbiyot universiteti” mas’uliyati cheklangan jamiyati ham bir qator yengilliklardan foydalanmoqchi.
Soliq boshqarmasi xodimlarining mazkur tadbirkorlik sub’ekti vakillari bilan uchrashuvida dastlab ularga subsidiya, imtiyoz va preferensiyalar ularning reyting darajasidan kelib chiqqan holda berilishi tushuntirildi. Shundan so‘ng ularning ayrim kamchiliklari ko‘rsatib o‘tilgan holda barqarorlik reytingida o‘rta, qoniqarli hamda quyi toifalardan yuqori toifaga erishish mezonlari aniq misollar bilan ko‘rsatib o‘tildi.
Ta’kidlab o‘tish joiz, viloyatda soliq xizmati xodimlarining “Soliqchi tadbirkorga ko‘makchi” tamoyili asosida tadbirkorlarga barqarorlik reytingini oshirishda yaqindan yordam berayotganliklari natijasida hududdagi 300 dan ortiq korxonalar yuridik shaxslar reytingida yuqori toifani egalladilar. Xuddi shunday, qoniqarli va quyi toifada bo‘lgan 6 000 dan ortig‘i korxonalar o‘rta toifaga ko‘tarildilar.
Buxoro viloyati soliq boshqarmasi
Matbuot xizmati.