#qonunchilikdagi_yangiliklar

 Tomorqa yerlari va dehqon xoʻjaliklari yer maydonlarida samarali foydalanish, mahallalarning ixtisoslashuvidan kelib chiqqan holda yuqori daromadli va eksportbop mahsulotlar yetishtirishni moliyaviy qo‘llab-quvvatlash maqsadida Prezident Farmoni qabul qilindi.

PF-22-son, 14.02.2025-yil

Farmonga ko‘ra:

Aholi tomorqasi va dehqon xo‘jaliklariga ijaraga berilgan yer maydonlaridan samarali foydalanish holati bo‘yicha hokim yordamchisi tomonidan hududning iqlim sharoitini inobatga olgan holda har chorakda o‘tkaziladigan monitoring natijasida ekin to‘liq ekilmagan yoki qarovsiz qolganlik holati aniqlanganda tajriba tariqasida (fors-major holatlari bundan mustasno) “Online mahalla" elektron platformasi ma’lumotlari asosida ekin ekilmaganligi aniqlangan yil uchun yer solig‘i stavkasi uch karra miqdorida hisoblanadi. Bunda:

berilayotgan imtiyozlarni vaqtinchalik to‘xtatish, qayta tiklash va oshirilgan soliq stavkalarini qo‘llash "mahalla yettiligi" xulosasiga asosan amalga oshiriladi va tegishli ma’lumotlar "Online mahalla" elektron platformasiga kiritib boriladi;

tomorqa va ijaraga berilgan yer maydonlaridan samarali foydalanish yo‘lga qo‘yilgan, ya’ni ekin ekiladigan maydonlariga ekin ekilgan taqdirda, "mahalla yettiligi" kafilligi bilan barcha imtiyozlar va amaldagi soliq stavkalari tiklab beriladi.

Aholi tomorqalaridan yuqori daromad olishni rag‘batlantirish maqsadida 2026-yildan boshlab tajriba tariqasida Namangan viloyatida dehqon xo‘jaliklari va tomorqa yerlarida yetishtirilgan mahsulotlardan olingan daromad miqdori 1 sotix uchun bazaviy hisoblash miqdorining 25 baravaridan yuqori bo‘lganda fuqarolar va (yoki) dehqon xo‘jaliklarining ekin bilan band bo‘lgan yer uchastkalari uchun to‘langan yer solig‘ining 90 foizi tegishli yil yakuni bilan qaytarib beriladi.

Mazkur tartib yer uchastkalaridan hujjatlarsiz yoxud yer uchastkasiga bo‘lgan huquqni tasdiqlovchi hujjatlarda ko‘rsatilganidan kattaroq hajmda foydalanilgan yer uchastkalariga nisbatan tatbiq etilmaydi.

2025-yil 1-martdan boshlab eksport qilish maqsadida qishloq xo‘jaligi mahsulotlarini jismoniy shaxslardan xarid qilgan korxonalar tomonidan qishloq xo‘jaligi mahsulotlari to‘g‘risidagi ma’lumotlar elektron shaklda soliq organlari ma’lumotlar bazasida aks ettirilishi soliq solish maqsadlarida kirim hujjatlariga tenglashtiriladi.

2025-yil 1-maydan boshlab alohida mahsulot turlarini yetishtirishga ixtisoslashgan tomorqa yer egalari va dehqon xoʻjaliklarining nufuzini oshirish, mahsulot brendini yaratish va qayta ishlovchi va eksport qiluvchi korxonalarga koʻmaklashishga qaratilgan “namunali aholi tomorqasi”, “namunali mahalla”, “namunali issiqxonalar” reytingi tuziladi.

Resurs soliqlar ma’muriyatchiligi boshqarmasi