Oʻzbekiston Respublikasi Prezidentining 2023-yil 12-iyundagi “Kambagʻallikni qisqartirishda tadbirkorlik subyektlari bilan oʻzaro manfaatli hamkorlik oʻrnatishga qaratilgan chora-tadbirlar toʻgʻrisida”gi PF-93-sonli Farmoniga asosan "20 ming tadbirkor - 500 ming malakali mutaxassis" dasturi ishga tushirildi. 

Dasturda tadbirkorlik subyektlari ularning huquq va majburiyatlari aks ettirilgan "Hamkorlik shartnomalari" asosida ixtiyoriy ravishda ishtirok etadi.

Dasturda Hamkorlik shartnomalari 41 tadan 200 gacha va undan ortiq ish oʻrni yaratga tadbirkorlik subyektlari ishtirok etib, yaratgan ish oʻrniga qarab Hokimliklar va kambagʻallikni qisqartirish va bandlik vaziri hamda iqtisodiyot va moliya vazirliklari bilan hamkorlik shartnomalari tuzadilar.

1.Jumladan, 41 tada 100 tagacha ishchi oʻrni yaratadigan tadbirkorlik subyektlari bilan tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimlarining yordamchilari (keyingi oʻrinlarda - hokim yordamchilari) takliflariga asosan Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari hamda ularning moliya-iqtisodiyot va kambagʻallikni qisqartirish masalalari boʻyicha birinchi oʻrinbosari bilan hamkorlik shartomasi tuzadilar. Ularga quyidagi imtiyoz va preferensiyalar beriladi.

- 7 yilgacha boʻlgan muddatga 14 foizlik stavkada 5 mlrd soʻmgacha imtiyozli kredit ajratiladi. 

- “Ijtimoiy himoya yagona reestri"ga (keyingi oʻrinlarda - Reestr) kiritilgan fuqarolar kamida bir yil davomida ish bilan taʼminlagan va ular jami ishchilar sonining kamida 20 foizini tashkil etganda, mol-mulk soligʻi va yer soligʻi boʻyicha amaldagi stavkaga nisbatan  50 foiz imtiyoz qoʻllaniladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblaganda, oylik ish haqi boʻyicha toʻlangan jismoniy shaxslardan olinadigan daromad soligʻi  100%  Respublika budjetidan ish beruvchiga (har bir ishchi uchun BHMning 2 barobaridan oshmagan miqdorda) qaytarib beriladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblanganda, ijtimoiy soliq boʻyicha amaldagi stavkaning 50 foizi miqdorida imtiyoz qoʻllaniladi.

- Barcha soliqlar (QQS va soliq agentlari sifatida toʻlanadigan soliqlar bundan mustasno) va bojxona toʻlovlarini taʼminotsiz va foizsiz 3 oyga boʻlib-boʻlib toʻlash imkoniyati beriladi.

2.101 tadan 200 tagacha yangi ish oʻrni yaratishni rejalashtirgan tadbirkorlik subyektlari bilan - hokim yordamchilarining takliflariga asosan Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari hamda ularning moliya-iqtisodiyot va kambagʻallikni qisqartirish masalalari boʻyicha birinchi oʻrinbosari tomonidan hamkorlik shartnomasi imzolanadi.

Ularga quyidagi imtiyoz va preferensiyalar beriladi.

- 7 yilgacha boʻlgan muddatga 10 mlrd soʻmgacha 14 foizlik stavkada imtiyozli kredit ajratiladi. 

- Reestrga kiritilgan fuqarolar kamida bir yil davomida ish bilan taʼminlangan va ular jami ishchilar sonining kamida 20 foizini tashkil etganda, mol-mulk soligʻi va yer soligʻi boʻyicha amaldagi stavkaga nisbatan  75 foiz imtiyoz qoʻllaniladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblanganda, oylik ish haqi boʻyicha toʻlangan jismoniy shaxslardan olinadigan daromad soligʻi 100% Respublika budjetidan ish beruvchiga (har bir ishchi uchun BHMning 2 barobaridan oshmagan miqdorda) qaytarib beriladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblanganda, ijtimoiy soliq boʻyicha amaldagi stavkaning 50 foizi miqdorida imtiyoz qoʻllaniladi.

- Barcha soliqlar (qoʻshilgan qiymat soligʻi va soliq agentlari sifatida toʻlanadigan soliqlar bundan mustasno) va bojxona toʻlovlarini taʼminotsiz va foizsiz 6 oyga boʻlib-boʻlib toʻlash imkoniyati beriladi.

3. 200 tadan ortiq yangi ish oʻrni yaratishni rejalashtirgan tadbirkorlik subyektlari bilan - Mahallabay ishlash va tadbirkorlikni rivojlantirish agentligi taklifiga asosan kambagʻallikni qisqartirish va bandlik vaziri hamda iqtisodiyot va moliya vaziri tomonidan hamkorlik shartnomasi tuziladi.

 Ularga quyidagi imtiyoz va preferensiyalar beriladi.

- 15 mlrd soʻmgacha 7 yilgacha boʻlgan muddatga 14 foizlik stavkada imtiyozli kredit ajratiladi. 

- Reestrga kiritilgan fuqarolar kamida bir yil davomida ish bilan taʼminlangan va ular jami ishchilar sonining kamida 20 foizini tashkil etganda, mol-mulk soligʻi va yer soligʻi boʻyicha amaldagi stavkaga nisbatan  100 foiz imtiyoz qoʻllaniladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblanganda, oylik ish haqi boʻyicha toʻlangan jismoniy shaxslardan olinadigan daromad soligʻiing  100%,  respublika budjetidan ish beruvchiga (har bir ishchi uchun BHMning ikki barobaridan oshmagan miqdorda) qaytarib beriladi.

- Reestrga kiritilgan fuqarolar ishga qabul qilinib, ularga har bir oy uchun ish haqi miqdori mehnatga haq toʻlashning eng kam miqdorining bir barobaridan kam boʻlmagan miqdorda hisoblanganda, ijtimoiy soliq boʻyicha amaldagi stavkaning 50 foizi miqdorida imtiyoz qoʻllaniladi.

- Barcha soliqlar (QQS va soliq agentlari sifatida toʻlanadigan soliqlar bundan mustasno) va bojxona toʻlovlarini taʼminotsiz va foizsiz 12 oyga boʻlib-boʻlib toʻlash imkoniyati beriladi.

-Tadbirkorlik faoliyatini qoʻllab-quvvatlash davlat jamgʻarmasi 5 milliard soʻmgacha kafillik beriladi.

Dasturda ishtirok etgan tadbirkorlik subyektlariga:

- qoʻshilgan qiymat soligʻi summasi oʻrnini qoplash (qaytarish) va barcha soliq turlari boʻyicha mavjud ortiqcha toʻlov summasini qaytarish muddati amaldagi stavkaga nisbatan ikki baravarga qisqartiriladi.

- Qoʻshilgan qiymat soligʻi boʻyicha maxsus roʻyxatdan oʻtkazilganligi toʻgʻrisidagi guvohnoma bekor qilinmaydi;

- Tovarlarni import qilishda toʻlanadigan qoʻshilgan qiymat soligʻi summalari Bojxona va soliq organlarining hisob tizimlarida oʻzaro hisobga olinadi.

- Bojxona nazoratini amalga oshirishda qoʻllaniladigan xavfni boshqarish darajasi "yashil yoʻlak" deb baholanadi.

- Barcha turdagi soliq tekshiruvlari oʻtkazish taqiqlanadi. (jinoiy ishlar doirasidagi tekshiruvlar bundan mustasno).

50 milliard soʻm va undan yuqori qiymatdagi loyihalarni amalga oshirganda belgilangan tartibda zarur tashqi muhandislik-kommunikatsiya tarmoqlari bilan Davlat budjeti mablagʻlari hisobidan taʼminlanadi;

Dasturga kiritilgan Toshkent shahridan roʻyxatdan oʻtgan tadbirkorlik subyektlariga nisbatan esa yuqoridagi imtiyozlarning faqatgina jismoniy shaxslardan olindigan daromad soligʻini 100 foiz Respublika budjetidan qoplanishi va ijtimoiy soliqning 50 foizga stavkasi kamaytirilishi boʻyicha imtiyoz va preferensiyalar qoʻllaniladi va 50 milliard soʻm va undan yuqori qiymatdagi loyihalarni amalga oshirganda belgilangan tartibda zarur tashqi muhandislik-kommunikatsiya tarmoqlari bilan Davlat budjeti mablagʻlari hisobidan taʼminlanadi.

Soliq solish metodologiyasi departamenti