Президентимизнинг “Коронавирус пандемиясининг салбий таъсирини камайтириш учун аҳоли, тадбиркорлик субъектлари, умумий овқатланиш, савдо ва хизматлар соҳасини қўллаб-қувватлашнинг қўшимча чора-тадбирлари тўғрисида”ги Фармони қабул қилинди. (№ПФ-6029-сон, 20.07.2020 й.)

Савдо ва умумий овқатланиш соҳасини қўллаб-қувватлаш

- 2020 йил 1 июлдан 2020 йил 31 декабрга қадар 11,1 мингдан зиёд умумий овқатланиш корхоналари айланмадан олинадиган солиқни тўлашдан озод этилди. Ушбу солиқ миқдори бир чоракда деярли 22,7 млрд сўмни ташкил этади.

- Шунингдек, биноларни ижарага беришга ихтисослашган корхоналар ҳам айланмадан олинадиган солиқни тўлашдан озод этилди.

- 1 июлдан бошлаб умумий овқатланиш корхоналари учун белгиланган ходимларнинг йиллик ўртача сони 25 нафардан 50 нафарга оширилди, уларга кичик тадбиркорлик субъектларига татбиқ этилган имтиёзлар ва преференциялар қўлланилади.

- 2020 йил 1 апрелдан 2020 йил 31 декабрга қадар 1665 та умумий овқатланиш корхонаси алкоголь маҳсулотлари билан чакана савдо қилиш ҳуқуқи учун йиғимни тўлашдан озод қилинди. Бу имтиёз тадбиркорлар ихтиёрида бир ойда ўрта ҳисобда 1,5 млрд. сўм қолдиради.

- Алкоголь маҳсулотларини етказиб бериш орқали сотиш ҳуқуқи берилди.

- 2021 йил 1 июлга қадар тадбиркорлик субъектлари автодўкон, автомагазин, автотиркама, автоцистерна ва фудтраклар орқали савдо қилиш мумкин.

Аҳоли ва тадбиркорликнинг бошқа турларини қўллаб-қувватлаш

- Давлат солиқ қўмитасининг қарори билан, 2020 йилда белгиланган муддатдан 5 кундан ортиқ вақт ўтмаган бўлса, солиқ тўловчилар солиқ ҳисоботларини тақдим этмаганлик учун жаримага тортилмайди. Солиқ кодексининг 220-моддасига мувофиқ, Солиқ ҳисоботини солиқ тўғрисидаги қонун ҳужжатларида белгиланган муддатларда тақдим этмаслик, солиқ ҳисоботи асосида тўланиши (қўшимча тўланиши) лозим бўлган солиқ суммасини белгиланган муддатда тўланмаган ҳар бир кечиктирилган кун учун бир фоиз миқдорида, лекин кўрсатилган сумманинг ўн фоизидан ортиқ бўлмаган миқдорида жарима солишга сабаб бўлади.

- 14 ёшгача болалари бўлган оилаларга ва икки ёшга тўлгунга қадар бола парвариши бўйича оналарга бериладиган нафақалар жисмоний шахслардан олинадиган даромад солиғини ҳисоблашда жами даромадга киритилмайди.

2020 йил 1 июлдан 2020 йил 31 декабрга қадар:

- жисмоний шахслар кўчмас мулкни ижарага беришдан олинган даромадлар бўйича жисмоний шахслардан олинадиган даромад солиғи тўлашдан озод этилди;

- мол-мулкини (бинолар ва автомобиль транспорти) ижарага берувчи жисмоний шахсларга солиқ мақсадида ижара тўловларининг энг кам ставкаларини қўллаш тартиби тўхтатиб турилади;

- ижарага берувчиларга 2020 йил учун ижара тўлови миқдорини пасайтириш тавсия этилди;

- Алкоголь маҳсулотларининг улгуржи савдоси билан шуғулланувчи корхоналарнинг ажратмалари миқдорини 5 фоиздан 3 фоизга пасайтиришга доир имтиёз муддати узайтирилди (ПФ–5969-сон Фармонга асосан).

Президентимизнинг 2020 йил 18 майдаги ПФ-5996-сон Фармонида белгиланган қуйидаги солиқ имтиёзлари ва преференциялари 2020 йил 31 декабрга қадар узайтирилди:

- Кичик тадбиркорлик субъектлари, бозорлар ва савдо комплекслари, кинотеатрлар, умумий овқатланиш корхоналари, жамоат транспорти корхоналари, спорт-соғломлаштириш муассасалари, шунингдек, йўловчи ташиш, маиший хизматлар кўрсатиш, биноларни, шу жумладан, банкетлар ўтказиш учун ижарага бериш фаолияти билан шуғулланувчи юридик шахслар учун мол-мулк солиғи ва ер солиғини тўлашдан озод қилиш бўйича берилган имтиёзлар. Жорий йилнинг 1 июлига қадар 31 932 солиқ тўловчига 176,3 млрд. сўмлик имтиёзлар тақдим этилди;

- Ижтимоий солиқ ставкасини 12 фоиздан 1 фоизга пасайтириш бўйича микрофирма ва кичик корхоналар учун берилган имтиёзлар. Акцизости маҳсулотлар ишлаб чиқарувчилар, давлат корхоналари ва устав жамғармасида (устав капиталида) давлат улуши 50 фоиз ва ундан юқори бўлган юридик шахслар бундан мустасно. Тақдим этилган имтиёз 220,7 млрд. сўмга тенг. (жорий йил 1 июль ҳолатига);

- Ишчиларининг сонидан қатъи назар, умумий овқатланиш корхоналари учун ижтимоий солиқнинг пасайтирилган ставкаси қўлланилади;

- Бир йилдан кам бўлмаган муддат давомида фаолиятни амалга ошираётган микрофирма ва кичик корхоналарга, кейинчалик кечиктирилган суммани 120 кунда тенг улушларда тўлаш шарти билан, товарларни (истеъмол товарларидан ташқари) олиб киришда божхона божи ва акциз солиғини тўлашни кечиктириш;

- Микрофирма ва кичик корхоналарда 2020 йил 15 май ҳолатига солиқлар, пенялар ва солиқ қонунчилигини бузганлик учун ҳисобланган жарималар бўйича мавжуд бўлган қарздорликни ундиришни тўхтатиш. Натижада 96 минг қарздор давлат бюджетига 952 млрд. сўм тўламайди.

“Маҳалла”, “Саховат ва кўмак” ҳамда “Ўзбекистон меҳр-шафқат ва саломатлик” фондларига беғараз ёрдам бериш (беғараз ёрдам олиш) қисмида фойда солиғи, қўшилган қиймат солиғи, айланмадан олинадиган солиқ ва жисмоний шахслардан олинадиган даромад солиғи бўйича имтиёзларнинг амал қилиши 2020 йил 31 декабрга қадар узайтирилди.

ДСҚ Матбуот хизмати