Davlat soliq qoʻmitasi rahbariyati hamda xotin-qizlar masalalari boʻyicha boshlangʻich tashkiloti tomonidan davlat soliq xizmatida faoliyat yuritayotgan ayollarni har tomonlama qoʻllab-quvvatlash, ma’naviy-ma’rifiy dunyoqarashini yanada kengaytirish va ularning ishchanlik kayfiyatini oshirish maqsadida yil davomida turli madaniy tadbirlar tashkil etishga alohida e’tibor qaratildi.

Jumladan, Davlat soliq qoʻmitasi raisi Sherzod Kudbiyevning Xalqaro xotin-qizlar kuni munosabati bilan  tizimda faoliyat yuritayotgan barcha ayollar bilan uchrashuvida soliq organlarida ayol xodimlar sonini oshirish, ular orasida rahbar kadrlarni tayyorlash kun tartibida ekani taʼkidlangani soha xodimalari uchun quvonchli xabar boʻldi.

Bundan tashqari, Navroʻz umumxalq bayrami arafasida ayollar oʻrtasida tashkil etilgan “Zakovat” intellektual oʻyinining navbatdagi turnirida ishtirokchilar intellektual salohiyatlarini sinovdan oʻtkazish imkoniga ega boʻlishdi.

Mustaqilligimizning 31 yillik bayrami munosabati bilan dam olish kunlarida Navoiy, Buxoro, Jizzax, Sirdaryo, Surxondaryo va Qashqadaryo viloyatlari davlat soliq organlarida samarali mehnat qilib kelayotgan 300 nafardan ortiq xotin-qizlar “Yangi Oʻzbekiston boʻylab sayohat qil” shiori ostida Toshkent viloyati Boʻstonliq tumanidagi “Barkamol” sport-sogʻlomlashtirish va dam olish maskanida hordiq chiqardi.

Davlat soliq xizmati ayollari jamoat ishlari va madaniy tadbirlarda faol ishtirok etib kelmoqda. 28–30-sentabr kunlari Toshkent shahrida boʻlib oʻtgan “Xon atlas” festivali tashabbusini qoʻllab-quvvatlab, unda faol ishtirok etdilar.

Shu yilning 4-oktabr kuni Davlat soliq qo‘mitasida 20 dan ortiq vazirlik va idoralar hamda 100 ga yaqin davlat va jamoat tashkilotlarining xotin-qizlar bilan ishlash bo‘yicha boshlang‘ich tashkiloti vakillari ishtirokida “Innovatsion yondashuv va kreativ fikrlash – yuksak natija omili” mavzusida Respublika seminar-treningi bo‘lib o‘tdi. Unda Bosh vazir o‘rinbosari – Oila va xotin-qizlar davlat qo‘mitasi raisi Zulayho Mahkamova ham ishtirok etdi.

Mazkur anjuman soliq organlarida xotin-qizlar bilan ishlash tizimi mutlaqo yangi bosqichga olib chiqilganining amaliy ifodasi bo‘ldi.

“Eng namunali boshlang‘ich tashkiloti-2022” ko‘rik tanlovining Respublika bosqichi yakunlanib, “Ayolini e'zozlagan yurt” shiori ostida Respublika bosqichi g‘olib va sovrindorlari 26-dekabr kuni taqdirlandi.  

O‘zbekiston Kasaba uyushmalari saroyida o‘tkazilgan mazkur taqdirlash marosimida Davlat soliq qo‘mitasi raisi maslahatchisi Gavharxon Muqaddasova 1-o'ringa loyiq topildi. 

Soliq xizmati organlarida Oila va xotin-qizlarni qo‘llab-quvvatlash maqsadida o‘tkazilayotgan  keng ko‘lamli    targ‘ibot tadbirlari “Eng namunali boshlang‘ich tashkiloti – 2022” ko‘rik-tanlovida faxrli 1-o‘ringa munosib ko‘rilgani ham tizimda ayni masalaga bo‘lgan munosabatning amaldagi e’tirofi bo‘ldi, deyish mumkin.