Ulug‘nor hududiy jihatdan Andijon viloyatining eng katta tumanlaridan biri hisoblanadi. Bu hududda ishlab chiqarish, sanoat, qishloq xo‘jaligi, bog‘dorchilik, ayniqsa, baliqchilik yaxshi rivojlangan. Shu boisdan bo‘lsa kerak, tuman aholisi barcha sohalarda ilg‘or va peshqadam. Birgina soliq tizimini olib qaraydigan bo‘lsak, samaradorlik ko‘rsatkichi (KPI) yuqori bo‘lgan soliq inspektorlarining asosiy qismini ham aynan ulug‘norliklar band etishgan. 

Bu bejizga emas. Tumanda tadbirkorlik ham yaxshi rivojlangan bo‘lib, ularning aksariyatini oziq-ovqat do‘konlari, umumiy ovqatlanish shoxobchalari, kiyim-kechak va qurilish mollari do‘konlari tashkil etadi. Hattoki, dehqonchilik mahsulotlari oldi-sotdisi bilan shug‘ullanuvchi kichik tadbirkorlar ham faoliyatini qonuniylashtirib, namunali soliq to‘lovchiga aylanib ulgurishgan. 

Qizig‘i shundaki, soliq inspektorining do‘konga kirib kelishini og‘rinib emas, balki ochiq chehra bilan kutib olishadi. O‘z ko‘zingiz bilan guvoh bo‘lmaguningizcha bunga ishonish qiyin albatta. 

Husniddin Sulaymonov Andijon viloyati bo‘yicha samaradorlik ko‘rsatkichi eng yuqori bo‘lgan (aprel oyida 97 %) soliq inspektori. Unga “Mingbuloq”, “Farovon”, “Terakzor” mahallalari biriktirilgan. Erta tongdan inspektorga hamrohlik qilib, bir kunlik ish faoliyatini qanday olib borishiga shaxsan guvoh bo‘ldik. Mahalla markazida joylashgan soliq inspektoriga biriktirilgan xona shundoq mahalla fuqarolar yig‘ini binosining yon tomonida ekan. Aksariyat tadbirkorlik subyektlari ham aynan mana shu markazdan boshlanadi. Biz kirib borgan qurilish mollari do‘koni ham aholiga kerakli xomashyolar yetkazish bilan shug‘ullanish barobarida qonun talablarida belgilab qo‘yilgan soliq to‘lovlarini ham o‘z vaqtida to‘lab kelayotgani ma’lum bo‘ldi. Inspektor Husniddin Sulaymonov sotuvchilarga onlayn nazorat kassa apparati va to‘lov terminallaridan foydalangan holda xaridni amalga oshirish kerakligini tushuntirib, keyingi do‘konga yo‘l oldi.

– Faoliyatim samaradorligining asosiy omili hududdagi tadbirkorlik sub’ektlarining barchasi qonuniy tarzda faoliyat olib borishidadir, – deydi inspektor Husniddin Sulaymonov. Ko‘rsatkichlarni o‘z vaqtida bajarish uchun har kunlik nazorat muhim hisoblanadi. Bundan tashqari, faqatgina tushumlar bilan cheklanib qolmasdan, o‘z faoliyatini endigina boshlagan tadbirkorlarga “soliqchi-ko‘makchi” tamoyili asosida ish faoliyatini qonuniylashtirish, shtat birliklarini legallashtirish va mehnat qonunchiligiga mos ravishda olib borish bo‘yicha tavsiya va maslahatlarimizni berib o‘tamiz. Bu ham tadbirkor uchun, ham o‘zimizning kelgusi faoliyatimiz uchun muhim hisoblanadi.

Husniddin Sulaymonov faoliyat olib borayotgan “Terakzor” mahallasi raisi ham inspektor faoliyatini ijobiy baholadi. – “Mahalla yettiligi” tizimi joriy etilib, soliq inspektorlari o‘z faoliyatini boshlashi biz uchun ham samarali bo‘ldi. Birgina misol, yil davomida mahalla hududining soliq tushumi 300 mln so‘mdan oshiq bo‘lsa, uning 10 foizi, ya’ni 30 mln so‘mdan ziyod mablag‘ mahalla fuqarolar yig‘ini balansida qolmoqda. Biz ushbu mablag‘larni “mahalla yettiligi” bilan bamaslahat, ijtimoiy ko‘makka muhtoj oilalarga ko‘maklashish, ichki yo‘llar va ariqlarni ta’mirlash kabi tarmoqlarga yo‘naltirishimiz mumkin bo‘ladi, – deydi mahalla fuqarolar yig‘ini raisi.

Suhbatimiz yakunida inspektor Husniddin Sulaymonovning tezda xayrlashib, kunlik rejalarni bajarishga oshiqayotganidan ham uning faoliyati yuqori ko‘rsatkichlarda baholangani behuda emasligiga amin bo‘ldik.

Andijon viloyati Soliq boshqarmasi Matbuot xizmati