Bir vaqtning o‘zida bir nechta axborot-tahliliy tizimlarni joriy etishga tayyorgarlik ko‘rilayotgaligi hamda ularni amaliyotga joriy etish muddatlarining qisqaligi, shuningdek, tizimlardagi ayrim kamchiliklar sababli, tadbirkorlik subyektlarida xavotir paydo bo‘lmoqda.

Shunga ko‘ra, maʼlum qilinadi-ki, barcha axborot-tahlil tizimlari maqsadli guruhlari va iqtisodiyot tarmoqlari (shu jumladan, kichik biznes) vakillari bilan birgalikda qayta ishlab chiqishni inobatga olgan holda bosqichma-bosqich ishga tushiriladi.

Xususan:

- “E-aktiv” tizimi: bugungi kunga kelib dastur modeli ishlab chiqilgan. Birinchi bosqichda u faqat kiruvchi va chiquvchi tovarlar oqimini hisobga olishga qaratiladi (EHF va BYUD asosida avtomatik ravishda). Tizim avtomatik buxgalteriya hisobot tizimlari (masalan, 1-C) bilan integratsiya qilingandan so‘ng, unda aktivlar va ularning realizatsiyasini aks ettirish bosqichi boshlanadi. “E-aktiv” AAT buxgalteriya hisobotlari o‘rnini bosmaydi va tovarlar xaridi va realizatsiyasida (shu jumladan, aktivlar relizatsiyasida) shaffoflikni taʼminlashga qaratilgan. Tizim yanvar oyi boshidan ishga tushiriladi va ushbu bosqichda tadbirkorlik subyektlaridan hech qanday amallarini “qo‘lda” bajarish talab etilmaydi. Bundan tashqari, dasturning asosiy yo‘nalishi, birinchi navbatda, soliq to‘lashdan bo‘yin tovlash sxemalarida qo‘llaniladigan yuqori likvidli tovarlar, shuningdek, kapitallashtirilmagan tovarlarni “aktivlar” niqobi ostida sotish monitoringiga qaratiladi;

- MXIK: o‘lchov birliklarini MXIKka biriktirish ham 2022-yil 10-yanvardan bozor ishtirokchilari bilan muhokama natijalaridan so‘ng tovarlar guruhi bo‘yicha bosqichma-bosqich boshlanadi (qo‘shimcha maʼlumotlar eʼlon qilinadi). Bunda, bozor ishtirokchilari o‘rtasidagi ko‘pchilik fikriga ustunlik beriladi. Davlat soliq qo‘mitasi uchun asosiy o‘lchov birliklari bazasini yaratish muhim, ayni paytda qaysi birliklarni o‘rnatish zarurligi tadbirkorlar tomonidan hal qilinadi. Bundan tashqari, tadbirkorlik subyektlariga Katalogda mavjud bo‘lgan tovar (xizmat)lar kodlaridan foydalanish tavsiya etiladi (Sizning maxsus mahsulotingiz bo‘lmasa, har bir subpozitsiya ro‘yxatida birinchi bo‘lib joylashgan umumiy subpozitsiya kodidan foydalanishingiz lozim). Katalogni kengaytirish ishlari Davlat soliq qo‘mitasi tomonidan ishlab chiqaruvchilar, import qiluvchilar va tashqi maʼlumotlar bazalari bilan ishlash asosida amalga oshiriladi. Bundan tashqari, MXIKni soddalashtirilgan qidiruv platformasini ishga tushirish rejalashtirilgan. Bunda qidiruv foydalanuvchilar tomonidan mustaqil amalga oshiriladi;

QQS guvohnomasi: bugungi kunda tizim test rejimida ishlamoqda va davlat organlarining boshqa axborot tizimlari bilan solishtirilmoqda. Axborot uzilishlari yuz bergan taqdirda, ushbu mezonlar tahlil uchun qabul qilinmaydi. Shu bilan birga, Vazirlar Mahkamasining 595-sonli qarori bilan soliq xavfini aniqlashning avtomatik tizimi belgilandi va u axborot almashinuvi to‘liq yo‘lga qo‘yilgandan keyingina o‘rnatiladi.

Buxgalterlar va bozorning boshqa ishtirokchilaridan tartibga soluvchi organ tomonidan rasman tasdiqlanmagan normativ-huquqiy hujjatlar bo‘yicha haqiqatga to‘g‘ri kelmaydigan izoh va fikrlarni bermasliklarini so‘raymiz.

Shu bilan bir qatorda, ushbu va boshqa axborot tizimlaridagi kamchiliklar, shuningdek takliflaringiz haqida ular ishlab chiqarilib, test rejimida ishga tushirilgandan so‘ng xabar berishingizni so‘raymiz.

Xususan, “E-aktiv” tizimidagi texnik va uslubiy kamchiliklar haqidagi xavotirlar QQS to‘lovchilar uchun rasman eʼlon qilinganidan keyingina qabul qilinishi mumkin. Bugungi kunda bildirilayotgan barcha fikrlar esa faqat hattoki dasturni ham ko‘rmagan alohida “mutaxassislar”ning shaxsiy xavotiridir. “Mutaxassislar”ning bunday xatti-harakati yangi dasturiy mahsullarni yengillik bilan ishga tushirishga qaratilgan konstruktiv muloqotni o‘rnatishni qiyinlashtiradi.

Shu munosabat bilan quyidagilarni maʼlum qilamiz:

- elektron hisobvaraq-fakturalarni shakllantirishda yuzaga kelgan qiyinchiliklar tufayli noyabr oyi uchun EHF shakllantirish muddati joriy yilning 20-dekabriga qadar uzaytirildi;

- amaldagi qonunchilikda tegishli MXIKlarning EHFda noto‘g‘ri aks ettirilganligi uchun javobgarlik nazarda tutilmagan. Bunda, sayyor soliq tekshiruvlari, MXIKlarga emas, balki avvalgidek EHFda ko‘rsatilgan tovarlarni o‘ziga xosliklarini hisobga olgan holda tahlil qilishga asoslanadi. 

Har qanday yuzaga kelgan savollaringizga javob olish uchun Davlat soliq qo‘mitasining mavjud aloqa kanallariga murojaat qilishingizni so‘raymiz!