Жорий йил 8 июль куни мамлакатимиз Президенти Шавкат Мирзиёев раислигида ўтказилган видеоселектор йиғилишида ҳудудларда тадбиркорликни ривожлантириш ҳамда бюджет тушумларини сўзсиз таъминлаш чора-тадбирлари муҳокама қилинди.

Давлатимиз раҳбари пандемиядан кучли бўлиб чиқишнинг бирдан бир йўли – кичик бизнес ва тадбиркорликка қулай муҳит яратиш эканлигини таъкидлади.

“Солиқ идораси – тадбиркорга кўмакчи”

Кичик бизнес ва хусусий тадбиркорлик учун қулай шарт-шароитларни яратишга солиқ идоралари жавобгардирлар, улар том маънода ҳар бир тадбиркор учун ҳамкор бўлиши лозим. “Солиқ идораси – тадбиркорга кўмакчи” янги тизими бизнес ҳамжамиятига тегишли муҳим вазифаларни бажаришда юқори талабларни қўяди.

Солиқ органлари тадбиркорга кўмакдош бўлади. Бу нима дегани?

Яъни:

- тадбиркорни иш бошлаш учун биринчи қадамидан, унга қайси солиқ режими қулай ва фойдали эканлигини танлаб беради;

- иш бошлаган тадбиркорни “яшаб кетиши”, фаолият кўрсатмаётганларни тиклашга кўмак бериши, бухгалериясини юритиши, ҳисоботларни тўлдириши ва топшириши, нима муаммоси бўлса ҳал этиш бўйича хизмат кўрсатади;

- қанча тадбиркор солиқ қонунчилигини бузганини аниқлаб, тадбиркорни жазолаш эмас, солиқ қонунчилигини бузиш қанчага камайганлиги ва тадбиркорни ортиқча харажатлардан сақлаб қолиш асосий мезон бўлади.

Солиқ хизматининг асосий вазифаларидан бири – тадбиркорлик субъектлари фаолиятини тиклаш. Бу эса бюджетни тўлдириш кафолати ҳисобланади.

Карантин талабларининг юмшатилиши натижасида корхоналар ўз фаолиятини тиклади. Бироқ 69 мингта тадбиркорнинг фаолиятини жонлантириш керак. 9 ой якуни бўйича уларнинг камида 70 фоизи, йил якунига қадар эса тўлиқ қувват билан ишлаши таъминланади.

Кейинги йилларда солиқ тизимини ислоҳ қилиш бўйича аниқ чоралар кўрилиши натижасида бизнес ихтиёрида 2019 йилда 12 триллион сўм қолди, 2020 йилда яна 11 триллион сўм маблағ қолиши кутилмоқда.

Бундан ташқари, 1 июлдан бошлаб илк маротаба тадбиркорларга қўшилган қиймат солиғининг бир қисмини қайтариш механизми амалга киритилди. Ушбу янгилик орқали жорий йилнинг биргина учинчи чорагида тадбиркорларга 700 миллиард сўмни айланма маблағ кўринишида қолдириш имконияти яратилмоқда.

Камбағалликни қисқартириш – 4-сектор иши 

Йиғилишда, камбағалликни қисқартириш бўйича олиб борилаётган ишларга ҳам тўхталиб ўтилди. Давлатимиз раҳбари камида 257 минг нафар муҳтож оила вакилларини ишга жойлаштириш зарурлигини қайд этди.

Янги тизим секторлар базасида ҳудудларни комплекс ижтимоий-иқтисодий ривожлантириш асосида ишлаб чиқилади.

Тўртта сектордан бири Давлат солиқ қўмитасига бириктирилган.

Карантин даврида ушбу стуруктура ходимлари долзарб муаммоларни – бандлик, тадбиркорликни ривожлантириш, инвестицияларни жалб қилиш, шунингдек, аҳолини ижтимоий ҳимоя қилиш, шу жумладан муҳтож оилаларни аниқлаш ва манзилли қўллаб-қувватлаш ҳамда камбағалликни бартараф этишда мақсадли ёндашувни фаоллаштирди.

4-сектор мамлакат қамровида:

- 2 055 та маҳалла фуқаролар йиғини;

- 7, 6 млн нафар аҳоли яшайди, шундан 360 минг нафари ёки 4,7% пандемия даврида эҳтиёжманд бўлиб қолди;

- мавжуд 2 млн оиланинг қарийб 90 минги ёки 4,5% учун пандемия даврида ижтимоий кўмак бериш талаб этилмоқда.

4 сектор томонидан олиб борилган амалий чоралар давомида деярли 50% эҳтиёжманднинг иш билан таъминлаш масаласи ижобий ҳал этилди. Қолганлар учун ҳам аниқ чоралар кўрилмоқда. Бунда фуқароларнинг танловига кўра, 10 та йўналишда доимий ёки мавсумий ҳақ тўланадиган фаолият таклиф этилмоқда.

Яъни, 4-сектор моддий ёрдамдан ташқари, аҳолини барқарор даромадли иш билан таъминлашга ҳам ёрдам бермоқда.

Бир сўз билан айтганда, Давлат солиқ хизмати органлари тадбиркорларга ҳар томонлама ёрдам бериб, корхоналар ва жамоатчиликка манзилли ёрдамлар кўрсатиб, мамлакатда бизнесни тикланишида бевосита иштирок этмоқда.

ДСҚ Матбуот хизмати