Joriy yilinng 5-dekabr kun AOKAda Soliq qo‘mitasi boshqarma boshlig‘i Dildora Xashimova ishtirokida bo‘lib o‘tgan brifingda soliq tizimini mahalla darajasiga tushirish bo‘yicha Soliq organlari tomonidan amalga oshirilayotgan ishlar yuzasidan maʼlumot berildi. 

Davlatimiz Rahbari tomonidan mahallani joylarda muammolarni hal qiladigan institutga aylantirish, amaldagi “beshlikka” soliq va ijtimoiy himoya xodimlarini qoʻshib, birgalikda ishlaydigan “mahalla yettiligi” faoliyatini yoʻlga qoʻyish boʻyicha berilgan topshiriq va vazifalari ijrosini taʼminlash maqsadida respublikaning 9 443 ta mahallasiga jami 4 383 nafar soliq xodimlari biriktirildi.

Bunda soliq organlarining asosiy vazifalari

- mahalladagi imkoniyatlarni ishga solib, soliq bazasini kengaytirish;

- faoliyat yuritayotgan tadbirkorlik subyektlarini toʻliq hisobga olish, oʻzini oʻzi band qilgan aholini tadbirkorlikka yoʻnaltirish hamda ularni kichik biznes toifasiga oʻtishiga koʻmaklashish;

- soliq toʻlovchilarga tushuntirish berish orqali yaqindan yordam berish;

- roʻyxatdan oʻtmasdan tadbirkorlik bilan shugʻullanayayotganlarni aniqlab, ularni faoliyatini qonuniylashtirishga koʻmaklashish;

- qoʻshimcha manbalarni aniqlash hisobiga mahalliy budjetga tushumlarni koʻpaytirish;

- boʻsh turgan va uzoq muddat davomida foydalanilmayotgan yer uchastkalari, bino-inshootlarni aniqlash va ularda tadbirkorlik faoliyatini yoʻlga qoʻyish boʻyicha ishlarni tashkillashtirishda amaliy yordam koʻrsatishdan iborat.

Erishilgan natijalar:

- Noqonuniy tadbirkorlik bilan shugʻullanayotgan 36 502 ta fuqarolarga yordam berilib ularning faoliyati qonuniylashtirildi, bunda 24 006 tasi yuridik shaxs 12 496 tasi YTT sifatida roʻyxatdan oʻtkazildi.

- 133 113 nafar mehnat bilan band boʻlgan aholi mehnat stajiga ega boʻlishi va kelgusida pensiya olishi uchun oʻzini oʻzi band qilgan shaxs sifatida roʻyxatdan oʻtkazildi;

- 9 275 ta oʻzini oʻzi band qilgan shaxslar yakka tartibdagi tadbirkorga aylantirilib ularning faoliyati kengaytirildi.

2 756 ta yakka tartibdagi tadbirkorlarni tovar aylanmasi oshgani hisobiga yuridik shaxs toifasiga oʻtkazilib faoliyatlari yiriklashtirildi.

9 561 ta korxonada 4937 ta obyektni ishga tushirish hisobiga 13 550 ta, shuningdek, 1 827 ta korxonada 715 ta yer uchastkalarini ishga tushirilishi hisobiga 4 837 ta ishchi oʻrni yaratildi.

Bundan tashqari, budjetga 222,5 mlrd soʻm qoʻshimcha manba jalb qilindi:

Masalan  aylanmadan olinadigan soliq toʻlovchilarni tovar aylanmasini oshirish hisobiga 50,1 mlrd soʻm aylanmadan olinadigan soliq;

- korxonalarda ishchilar soni hamda mehnatga haq toʻlash fondini oshishi hisobiga 84,7 mlrd soʻm jismoniy shaxslardan olinadigan daromad soligʻi va ijtimoiy soliq; 

- yangi roʻyxatga olingan obyektlar hisobiga 81,7 mlrd soʻm yer va mol-mulk soliqlari qoʻshimcha hisoblandi.

Soliq xodimlarining faoliyati samaradorligini baholash uchun “Mahallalarda soliq organlari faoliyati” axborot tizimi  ishlab chiqildi. Axborot tizimidagi maʼlumotlar onlayn ravishda har soatda yangilanadi va shu asosda mahallaga biriktirilgan inspektorlarning oldiga kunlik vazifalarni belgilaydi hamda natijalarni avtomatik ravishda tahlil qiladi. Mahallaga biriktirilgan soliq inspektorining faoliyati onlayn kuzatilib, samaradorlik koʻrsatgichi (KPI) 21 ta mezon orqali baholab boriladi.

Soliq organi soliq toʻlovchilarda soliq majburiyatlarini ixtiyoriy bajarish darajasini oshirish, sogʻlom raqobat muhitini shakllantirish va intizomli soliq toʻlovchilarni ragʻbatlantirish kabi manzilli ishlarni davom ettiradi. Eʼtiboringiz uchun rahmat. 

Soliq qo‘mitasi Matbuot xizmati