Ўзбекистон Республикаси Вазирлар Маҳкамаси ҳузуридаги Солиқ қўмитаси

Бухорода 1000 га яқин корхона фаолиятини қайта тиклади

11/05/2020

Ҳаёт давом этади

Коронавирус пандемияси туфайли карантин тартиби жорий этилгач, жойларда кўпчилик тадбиркорлик субъектлари ўз фаолиятларини тугатишган эди.

Биргина Бухоро вилоятида мавжуд 21 121 та тадбиркорлик субъектларининг 5 272 таси пандемия вақтида фаолиятини тўхтатган эди.

Таъкидлаш лозимки, Ўзбекистон Республикаси Президентинг 2020 йил 3 апрелдаги “Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлари тўғрисида”ги ПФ-5978-сонли фармони бундай оғир вазиятда иқтисодий қийинчиликларга дуч келган тадбиркорлик субъектларини қўллаб-қувватлашда муҳим омил бўлди.

Эътиборлиси, ўтган қисқа давр мобайнида вилоятда мазкур фармон ижросини таъминлаш, коронавирус пандемияси оқибатида юзага келаётган муаммолар ҳамда унинг оқибатида фаолиятни давом эттиришга тўсқинлик қилаётган омилларни бартараф этишга қаратилган аниқ чора-тадбирлар натижасида вилоятдаги 974 та корхона карантин қоидаларига риоя этган ҳолда фаолиятини тиклади.

Жумладан:

102 та саноат,

163 та қурилиш,

49 та умумий овқатланиш,

446 та улгуржи ва чакана савдо ҳамда

212 та маиший хизмат корхоналари ўз фаолиятини тиклади. Айни пайтда ушбу корхоналарда карантин қоидаларига риоя этган ҳолда фаолият юритиши тўлиқ назоратга олинган.

Маълумот ўрнида айтиш мумкин, вилоятда фаолият юритмаётган қолган жами 4 298 та корхоналарда ҳам карантин чекловларини юмшатиш ва уларнинг белгиланган тартибга риоя қилган ҳолда фаолият кўрсатишига рухсат бериш чоралари кўрилмоқда.

Бухоро вилояти

ДСБ Матбуот хизмати.