Ўзбекистон Республикаси Солиқ қўмитаси

Chevrolet Spark автомобили ва бошқа қимматбаҳо совғалар кимларга насиб этди?

30/01/2021

Бугун, 30 январь куни ДСҚ ютуқли чек ўйинларининг 2021 йилдаги биринчи тиражи бўлиб ўтди.

Ўйин очиқ ва шаффоф тарзда ўтказилди: тадбир «O’zbekiston» телеканали орқали Тошкент вақти билан соат 18:00 дан 19:30 га қадар жонли эфирга узатилди.

Тиражда давлат ва нодавлат ташкилотлари вакиллари, таниқли журналист ва хонандалар эксперт сифатида иштирок этди.

Ютуқли чек ўйинларининг жорий йилдаги биринчи тиражида онлайн назорат-касса машиналари ва виртуал кассалар орқали берилган 213 130 та чеклар рўйхатдан ўтказилди – бу янги рекорд.

Совғаларнинг хилма-хиллиги ҳам қувонарли: маиший техника, «Хумсон» санаториясига йўлланма, мобил телефон, пул мукофотлари - жами 25 та совғалар ўйналди. Жумладан, Тошкент вилояти ҳудудида жойлашган савдо нуқтасидан берилган омадли чек эгасига Chevrolet Spark автомобили насиб қилди.

Ғолиблар орасида – Тошкент, Самарқанд, Бухоро, Жиззах, Наманган, Қашқадарё, Фарғона вилояти, Қорақалпоғистон Республикаси ва Тошкент шаҳри истеъмолчилари бор. Ғолиблар рўйхати билан қуйидаги жадвалда танишинг.

Ютуқли чек ўйинлари барча мамлакатимиз истеъмолчилари ўртасида ўтказилмоқда.

Ўйинда иштирок этиш учун автомобилларга ёқилғи қуйиш шохобчаси, дорихона, спиртли ичимликлар ва тамаки маҳсулотлари сотадиган, шунингдек йиллик обороти 100 млн. сўм ва ундан юқори бўлган йирик савдо, хизмат кўрсатиш нуқталаридан берилган онлайн назорат-касса машиналари ва виртуал касса чекларини рўйхатдан ўтказишнинг ўзи кифоя.

Биринчи тиражнинг ёрқин таассуротларини бизнинг фоторепортажимизда томоша қилинг.