Ўзбекистон Республикаси Президенти 2021 йил 16 июнь куни «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги фармонга имзо чекди.

Фармон билан, барча давлат ҳокимияти ва бошқаруви органлари, ташкилотлари  томонидан очиқ маълумотлар сифатида жойлаштирилиши керак бўлган ижтимоий аҳамиятга молик маълумотлар рўйхати тасдиқланди.

Давлат органлари ва ташкилотлари ҳар йили ўз фаолиятига оид ҳисоботларни:

– 1 мартга қадар  (давлат сирлари ва хизматда фойдаланиш учун мўлжалланган маълумотлар бундан мустасно) расмий веб-сайтларига жойлаштиради;

– 10 мартга қадар кенг жамоатчилик иштирокида муҳокама қилиш жойи ва вақти ҳақида хабар беради;

– 1 апрелга қадар кенг жамоатчилик иштирокида муҳокама қилиш учун матбуот анжуманни ўтказади.

Шунингдек, 2021 йил 1 июлдан давлат органлари ва ташкилотлари қуйидаги маълумотларни Ўзбекистон Республикасининг Очиқ маълумотлар порталига ва ўз расмий веб-сайтларига жойлаштириб, уларни ҳар чоракда янгилаб боради:

– амалга оширилган давлат харидлари, шу жумладан, тўғридан-тўғри шартномалар бўйича харид қилинадиган товарлар (ишлар, хизматлар);

– мансабдор шахсларнинг хизмат сафарлари ва хориждан ташриф буюрган меҳмонларни кутиб олиш харажатлари;

– Президент ва Ҳукумат ҳужжатлари билан солиқ, божхона имтиёзлари ҳамда преференциялар, шу жумладан, индивидуал имтиёзлар берилган субъектларнинг бенефициарлари, улар томонидан тўланган солиқлар ва молиявий кўрсаткичлар;

– йиллик харажатлар сметаси ва унинг ижроси, шу жумладан, объектларни қуриш, реконструкция қилиш ва капитал таъмирлаш ишлари, автомототранспорт воситаларини сотиб олиш харажатлари.

Бундан ташқари, давлат органлари ва ташкилотлари 2021 йил 1 июлдан ўз ҳузурида фаолият юритувчи жамоатчилик кенгашлари билан биргаликда расмий веб-сайтларида қуйидаги маълумотларни жойлаштириб, ҳар чоракда янгилаб боради:

– жамоатчилик кенгашининг тасдиқланган аъзолари ҳақидаги маълумотлар билан бир қаторда уларнинг алоқа маълумотлари (телефон, почта ва электрон манзиллари);

– жамоатчилик кенгашининг йиғилишлари ва кун тартибидаги масалалар;

– давлат харидларини амалга оширувчи комиссиянинг тасдиқланган аъзолари тўғрисидаги маълумотлар (ФИО, иш жойи ва эгаллаб турган лавозими);

– лицензия ва рухсат этиш хусусиятига эга ҳужжатларни беришга ваколатли ҳамда хабарномаларни қабул қиладиган органларнинг ҳудудлар кесимида масъул ходимлари, шу жумладан, ушбу тоифадаги ҳужжатларни беришни ташкиллаштирадиган тегишли комиссия аъзолари тўғрисидаги маълумотлар (ФИО, эгаллаб турган лавозими).

Давлат солиқ қўмитаси 2021 йил 1 июлдан бошлаб давлат иштирокидаги корхоналар томонидан йил (чорак) якуни бўйича тўланган дивидендлар тўғрисидаги маълумотларни порталга жойлаштиради ва ҳар чоракда янгилаб боради.

Фармонга кўра, тегишли вазирлик ва давлат ташкилотлари томонидан 2021 йил 1 октябрга қадар давлат органлари ва ташкилотлари фаолияти очиқлигини мониторинг қилиш ва баҳолаш бўйича методика ишлаб чиқилади. Ушбу методика асосида йил якуни бўйича давлат органлари ва ташкилотлари фаолиятининг Очиқлик индекси аниқланади.

Мазкур Фармонда кўрсатилган қоида ва тартибларнинг бузилиши давлат органлари ва ташкилотлари фаолиятининг очиқлиги тўғрисидаги қонунчилик бузилиши сифатида баҳоланади.