Davlat soliq xizmati organlarida joriy yilning 15-martidan 15-apreliga qadar “Davlat soliq xizmati organlarini korrupsiyadan holi tizimga aylantirish” oyligi o‘tkaziladi.

Mazkur oylik davomida markaziy apparat, Yirik soliq to‘lovchilar bo‘yicha hududlararo davlat soliq inspeksiyasi, hududiy davlat soliq xizmati organlari, Kadastr agentligi, qo‘mita tasarrufidagi korxona va muassasalar mas’ul xodimlari o‘rtasidan korrupsiyaga qarshi kurashishga qaratilgan amaliy-targ‘ibot tadbirlari o‘tkazish rejalashtirilgan.

Jumladan, davlat soliq xizmati organlari xodimlarining daromadlari, mol-mulklari va majburiyatlarini ixtiyoriy deklaratsiyalash amaliyoti joriy etiladi.

“ISO 37001:2016 korrupsiyaga qarshi kurashish menejment tizimi” xalqaro standart talablaridan kelib chiqqan holda hamda jamoatchilik nazoratini kuchaytirish, shuningdek, soliq xodimlari ish faoliyatida korrupsion holatlarga yo‘l qo‘ymaslik yuzasidan soliq to‘lovchilar fikrini o‘rganish maqsadida, ijtimoiy tarmoq orqali anonim so‘rovnoma o‘tkazilmoqda.

Oylik davomida DSQ huzuridagi Fiskal istitut, Toshkent shahar soliq texnikumi o‘qituvchi va talabalari ishtirokida “Korrupsiya – jamiyat rivojiga to‘siq” mavzusida davra suhbati o‘tkaziladi. Unda “Halollik vaksinasi” tamoyili asosida talabalarda korrupsiyaga qarshi immunitetni shakllantirish, ular soliq tizimining kelajagi ekanligini tushuntirish yuzasidan fikr almashish nazarda tutilgan.

Shuningdek, hududlarda tadbirkorlik subyektlari vakillari bilan uchrashuvlar tashkil etilib, ular duch kelayotgan muammolarga aniq yechimlar berish masalalari ko‘riladi.

Bundan tashqari, Qo‘shilgan qiymat solig‘idan bo‘lgan salbiy farq summasini qaytarish, soliq tekshiruvlari o‘tkazish, mahalliy soliqlarni undirish va soliq organlariga ishga qabul qilishda korrupsion holatlarni bartaraf etish yo‘nalishida amalga oshirilgan ishlar tahlil qilinib, bu boradagi chora-tadbirlar yanada takomillashtiriladi.

Eslatib o‘tamiz, Davlat soliq qo‘mitasi markaziy apparati korrupsiyaga qarshi kurashish bo‘yicha “ISO37001:2016” xalqaro sertifikatiga ega.