Президентимизнинг жорий йил 4-5 февраль кунлари Фарғона вилоятига ташрифи мобайнида шаҳар ва туманларни маҳаллабай тизимда ривожлантириш, маҳаллабай кесимида аҳоли муаммоларини ўрганиш ва ўз вақтида бартараф этиш мақсадида сектор раҳбарларига қатор топшириқлар берилди.

Шу муносабат билан, Фарғона туманини ижтимоий-иқтисодий ривожлантириш бўйича Давлат солиқ қўмитаси раисининг махсус штаби ташкил этилиб, айни кунларда маҳаллабай кесимида муаммоларни ўрганиш ва бартараф этиш, маҳаллаларнинг ўсиш нуқталарини аниқлаш ишлари олиб борилмоқда.

Тумандаги 76 та маҳаллада жами 46 354 та хонадон мавжуд бўлиб, уларда 227,2 минг нафар аҳоли истиқомат қилади.

Ишчи гуруҳ аъзолари тумандаги барча маҳаллаларда бўлиб, хонадонма-хонадон аҳоли билан юзма-юз учрашувлар ўтказяпти, муаммоларини тинглаяпти. Ўрганишлар натижаларига кўра, доимий иш билан таъминлаш, кредит олиш, тадбиркорлик фаолиятини йўлга қўйиш учун амалий ёрдам кўрсатиш, электр устунларини янгилаш каби 2 047 та муаммо борлиги аниқланди. Аниқланган муаммоларнинг аксарият қисми ишсизлик бўлиб, ҳозирга қадар 1005 нафар фуқаронинг бандлиги таъминланди.

Биргина мисол, 30 нафар ишсиз фуқаро тумандаги замонавий сантехника маҳсулотлари ишлаб чиқарувчи «Экокерама» МЧЖга ишга жойлаштирилди.

Ишчи гуруҳ аъзолари «Наврўз» МФЙ Қоровултепа кўчасида яшовчи А.Ғофуров хонадонида ҳам бўлиб, фуқаро билан суҳбатлашдилар. Айтишича, хонадонида кўп йиллардан бери гулчилик билан шуғулланиб келади, лекин оила аъзоларидан ҳеч бири расмий иш билан банд эмас. «Келажакда пенсияга чиқишим мумкинми?» деган саволга жавоб излаяпти. Мутахассислар томонидан зарур тушунтиришлар берилгач, А.Ғофуров ва унинг турмуш ўртоғи ўзини ўзи банд қилган шахс сифатида рўйхатдан ўтди ва энди улар қонуний меҳнат стажига эга бўладилар.

Шунингдек, маҳаллаларнинг ўсиш нуқталарини аниқлаш мақсадида «маҳалла драйверлари» ўрганилмоқда. Унга кўра, чорвачилик, паррандачилик, асаларичилик, иссиқхона ташкил этиш, боғдорчилик каби йўналишларда турли лойиҳалар амалга ошириш имконияти мавжуд бўлиб, уларда яратиладиган иш ўринлари ҳисобидан фуқаролар бандлигини таъминлаш мумкинлиги аниқланди.

Ишчи гурухлари томонидан ўтказилган ўрганишлар давомида электр таъминоти борасидаги муаммолар ҳам бартараф этилмоқда. Хусусан, «Майдон» МФЙ Узумзор кўчасида 1,5 км масофада 0,4 кВ ли хаво узатма кабели тортилди ва бетон устунлар ўрнатилди. Шунингдек, ушбу махалладаги Майдон кўчасидаги трансфарматор мукаммал таъмирланди.

Бундан ташқари, ичимлик суви билан боғлиқ муаммолар ҳам ижобий ҳал этилмоқда. Тумандаги 8 та МФЙда сув кувурларини тортиш ва таъмирлаш ишлари амалга оширилди. Биргина Барқарор ҳамжиҳатлик маҳалласида аҳолини тоза ичимлик суви билан таъминлаш  мақсадида  2,1 км ичимлик суви тармоғи ёткизилди.

Ёғингарчилик кунларда лой бўлиб кетадиган 2,2 км ички йўллар шағаллаштирилди.

Бундан ташқари, ишчи гуруҳи томонидан тиббиёт соҳаси ходимлари билан ҳамкорликда аҳолининг саломатлиги ўрганилиб, бугунги кунга қадар тиббиёт муассасаларида ётиб даволанишга муҳтожларнинг 28 нафарига имтиёзли ордерлар тақдим этилди.

Шу билан бирга, Президентимиз Фарғона вилоятига ташрифи давомида берган топшириқларига кўра, туманни маҳаллабай тизимда ривожлантириш мақсадида Фарғона туманидаги 4 та секторнинг ҳар бирида иқтисодий комплекснинг малакали 5 нафар ходимларидан иборат “бошқарув офислари” ташкил этилди. Уларга маҳаллага бириктирилган банк ходимлари билан бирга, жойлардаги шароитни ўрганиб, янги лойиҳаларни шакллантириш ва амалга оширишга кўмаклашиш вазифалари қўйилди.

 Фарғона вилоят ДСБ Матбуот хизмати