Бугун, 28 июль куни Давлат солиқ қўмитаси ютуқли чек ўйинлари биринчи тиражи ғолибларига ютуқлари топширилди.

22 июль куни ташкил этилган ДСҚ ютуқли чек ўйинларининг биринчи тиражида 20 та соврин, шу жумладан Chevrolet Nexia 3 ўйналди. Ўйинда Тошкент шаҳридаги савдо ва хизмат кўрсатиш нуқталарига ўрнатилган онлайн НКМ ва виртуал кассаларнинг 10 мингга яқин рўйхатдан ўтказилган QR кодли чеклари иштирок этди.

Ютуқли чек ўйинларини ўтказиш ҳақидаги низомга мувофиқ, 23 июль куни барча совриндорларнинг телефон рақамларига ғолиб бўлганлиги ҳақида SMS хабарнома юборилди.

Муҳим! Иштирокчилар фақат ҳақиқий ютуқли чекларни бутун ҳолатда тақдим этиб, ўз совринини олиши мумкин.

Омадли чек соҳиблари ўз таассуротлари билан бўлишди:

Зарина Раҳмонова, Тошкент давлат фармацевтика институти магистри – кир ювиш машинаси соҳибаси: 

– Мен ютуқ чиқишига умид қилиб, учта чекни рўйхатдан ўтказдим. Чекларни олишда ёки унинг QR кодини сканер қилишда ҳеч қандай муаммога учрамадим. Бу каби ўйинлар истеъмолчиларга ҳам, сотувчиларга ҳам истеъмолчилик маданияти ва молиявий жавобгарлик ҳақида тушунчага эга бўлишга ёрдам беради. 

Кирилл Бокатов, Экология соҳасида менеджер – телевизор ва кондиционер соҳиби: 

– Тан оламан июль ойи бошида рўйхатдан ўтказган чекларим фақат битта эмасди. Чекларни талаб қилиб олиб, уларнинг QR кодини сканер қилиш менинг кундалик севимли юмушимга айланди. Ғолиб бўлишни ва барча яқинларимни хурсанд қилишни жуда хоҳлагандим. Мен совриндор бўлганимни, боз устига иккита ютуқ соҳиби бўлганимни эшитиб, кўплаб дўстларим ва қариндошларим ўйинга қўшилди. Иккинчи турда кўпчилик бўлиб иштирок этамиз. Чекларни талаб қилиб, улар ҳақидаги маълумотларни диққат билан ўқий бошладим, сотувчи суммани ва айнан харид қилинган товарлар номини тўғри кўрсатган ёки кўрсатмаганлигини текшира бошладим. 2022 йилнинг бошидан барча савдо нуқталарида онлайн кассалар ўрнатилади. Биз, истеъмолчилар ҳам замон билан ҳамнафас бўлишимиз лозим. 

Жаҳонгир Абдусатторов, Тошкент давлат юридик университети талабаси – велосипед соҳиби: 

– Aгар сиз қонунларни билсангиз ва уларга амал қилсангиз, ўз ҳуқуқларингизни ишончли ҳимоя қилишингиз мумкин. Ютуқли чек ўйини ҳақида билиб, ҳамма жойда QR кодли чекларни талаб қила бошладим. Баъзан онлайн кассалардан фойдаланмаётганликларини айтиб, рад этишди. Масалани ўргандим: менга керак бўлган чеклар дорихоналарда, ёнилғи қуйиш шохобчаларида, йирик чакана савдо дўконларида берилишини билиб олдим. Энди менинг атрофимдагилар чекларни фақат ютуқли ўйинда қатнашиш учунгина талаб қилмайди. Чек – сифатсиз товарларни қайтариш ёки алмаштиришда фойдали бўлиши мумкин бўлган муҳим ҳужжат бўлиб, уни сотиб олиш фактини тасдиқлайди.

Мирзажон Юлдашев, Шайхонтоҳур тумани “Ипакчи” МФЙ раиси ўринбосари – автомобил соҳиби: 

– Кутилмаган янгиликдан оиламдагиларнинг барчаси – ота-онам, тўрт фарзандим ва етти набирам жудаям хурсанд бўлди. Ҳаммадан кўра, оилавий поликлиникада ишлайдиган турмуш ўртоғим қувонди. У биз қачондир автомобиль сотиб олишимизга ишонмас эди. SOLIQ мобил иловасида чекларни рўйхатдан ўтказдик ва бошқларга ҳам ўйин ҳақида айтдик. Ўзим ўйин трансляциясини кўролмадим. Хушхабар ДСҚ томонидан жонли эфирда қўнғироқ орқали етказилди – мана бу ҳақиқий омад! Ҳалигача танишларим ва яқинларим табрикламоқда. QR кодли чекларни талаб қилинг ва ғалабага ишонинг! 

Эслатиб ўтамиз, ютуқли чек ўйинлари айни вақтда фақат Тошкент шаҳри истеъмолчилари ўртасида ўтказилмоқда. Унда иштирок этиш учун олинган чекнинг QR кодини SOLIQ мобил иловасида сканер қилиш ёки унинг (12 хонали) фискал белгисини 1077 қисқа рақамига SMS тарзида юбориш керак.

Ҳозирда иккинчи тираж учун чекларни рўйхатдан ўтказиш давом этмоқда. Омадингизни қўлдан бой берманг!

Тақдирлаш маросимидан фотогалерея: 

 ДСҚ Матбуот хизмати