Ўзбекистон Республикасининг ЎРҚ-599-сон Қонуни ҳамда Солиқ кодексига мувофиқ Вазирлар Маҳкамасининг “Қўшилган қиймат солиғи ҳамда чет эл юридик шахслари билан боғлиқ солиқ маъмурчилигини такомиллаштириш тўғрисида”ги қарори лойиҳаси тайёрланди.

Мазкур қарорга асосан солиқ маъмуриятчилигини тартибга солувчи 6 та низом тасдиқланиши кутилмоқда. Жумладан:

I. ҚҚС суммаси ўрнини қоплаш тартиби тўғрисидаги низом билан:

- солиқ суммасини қоплаш учун асос бўлувчи ҳамда экспорт операцияларини тасдиқловчи ҳужжатлар ва уларни тақдим этиш;

- қопланадиган солиқ суммасини асосланганлиги юзасидан камерал солиқ текширувини ўтказиш;

- солиқ суммасини қоплаш ва унинг амалга оширишнинг тезлаштирилган;

- чет эл дипломатик ва уларга тенглаштирилган ваколатхоналарга ҳамда маҳсулот тақсимотига оид битим иштирокчиларига солиқ суммасини қоплаш (қайтариш) тартиблари;

II. Ҳисобварақ-фактураларнинг шакли ва уларни тўлдириш тартиби тўғрисидаги низом билан:

- товарлар (хизматлар) реализациясида ҳисобварақ-фактураларни тўлдириш;

- дори воситалари ва тиббий буюмларни реализация қилишда, воситачилик, топшириқ ва транспорт экспедицияси шартномалари асосида тадбиркорлик фаолиятини амалга оширишда ва айрим шартномалар бўйича товарларни (хизматларни) реализация қилишда ҳамда чегирмаларни тақдим этишда ҳисобварақ -фактураларни расмийлаштиришнинг ҳамда уларни электрон қабул қилиш ва жўнатишнинг ўзига хос хусусиятлари;

III. ҚҚС базасини товарларнинг (хизматларнинг) бозор қийматидан келиб чиқиб аниқлаш тартиби тўғрисидаги низом билан:

- ҚҚСни ҳисоблаш ва тўлаш чоғида товарларнинг (хизматларнинг) бозор қийматини аниқлаш тартиби;

IV. Товарларга (хизматларга) ҳақ тўлаш бўйича мажбурият умид қилиб бўлмайдиган қарздорлик деб эътироф этилганда ва уни ҳисобдан чиқариш лозим бўлган ҳолларда ҚҚС базасига тузатиш киритиш тартиби тўғрисидаги низом билан:

- товарларга (хизматларга) ҳақ тўлаш бўйича мажбуриятни умид қилиб бўлмайдиган қарздорлик бўйича қарор қабул қилиш шартлари;

- ҚҚС базасига тузатишлар киритиш қоидалари;

V. Чет эл юридик шахсларида иштирок этиш тўғрисидаги хабарномаларнинг шакллари, уларни тўлдириш ва тақдим этиш тартиби тўғрисидаги низом билан:

- хабарноманинг шакли ва мазмуни, шунингдек умумий талаблар ва уларни тўлдириш тартиби, шу жумладан жисмоний шахслар, хорижий юридик шахслар, Ўзбекистон Республикаси корхоналари, юридик шахс ташкил этмаган хорижий тузилмалар тўғрисидаги маълумотлар, шунингдек солиқ тўловчининг хорижий юридик шахсида билвосита иштирок этиш тартиби;

VI. Назорат қилинадиган чет эл компаниялари ҳақидаги хабарномаларнинг шакллари, уларни тўлдириш ва тақдим этиш тартиби тўғрисидаги низом билан:

- хабарноманинг шакли ва мазмуни, шунингдек умумий талаблар ва уларни тўлдириш тартиби, шу жумладан чет эл компанияларини бошқарувчи шахслар деб ҳисобланган жисмоний ёки юридик шахс тўғрисидаги маълумотлар, уларнинг молиявий ҳисоботи, бошқариладиган хорижий компанияда билвосита иштирок этиш тўғрисидаги маълумотлар.

Мазкур низомлар билан белгиланаётган тартиблар ва қоидалар янги таҳрирда қабул қилинган Солиқ кодексининг айрим нормаларини тўғри қўллаш учун солиқ тўловчиларга ҳамда солиқ маъмуриятчилигини ташкил этишда қўшимча қулайликлар яратиши билан бир қаторида, солиқ солишнинг аниқлилик, адолатлилик ва ошкоралик принципларини таъминлашга хизмат қилади.

Муҳокама 2020 йил 4 июлгача давом этади.

ДСҚ Матбуот хизмати