Хўжалик юритувчи субъектлар учун янада қулайлик яратиш, электрон ҳужжат айланиш тизимини ривожлантириш ҳамда ҳужжатларни электрон шаклга ўтказиш мақсадида Электрон ҳужжат айланиш тизими орқали шартномаларни расмийлаштириш имконияти яратилган. Бунинг учун қуйидаги кетма-кетликда амаллар бажарилади. 

www.soliqservis.uz сайтидан “Шартнома яратиш” банди танланади. 

Ушбу банд очилганда “Ижрочи” яъни шартномани яратувчи маълумотлари автоматик равишда шаклланади. “Шартнома” бандида шартноманинг асосий маълумотлари кўрсатилади, “Мижоз” бандига эса иккинчи тараф маълумотлари киритилади. 

“Мижоз” бандининг “СТИР” қатори тўлдирилганида қолган маълумотлар тегишли катакларда автоматик равишда тўлдирилади.

Тўлдирилган маълумотлар етарли бўлмаган тақдирда уларни ўзгартириш ёки қўшимча киритиш имконияти ҳам мавжуд.  

Бундан ташқари “Мижоз қўшиш” тугмаси орқали шартноманинг бошқа иштирокчиларини ҳам қўшиш имконияти мавжуд. 

Кейинги бандда етказиб бериладиган товарлар ёки бажариладиган ишларнинг номи коди нархи ва бошқа маълумотлари акс эттирилади. 

Шунингдек, ушбу бандда “Янги қатор қўшиш” ҳамда “Охирги қаторни ўчириш” тугмалари ҳам бўлиб, етказиб бериладиган ишлар ва бажариладиган хизматларни қўшиш ёки олиб ташлаш имконияти мавжуд. 

Кейинги босқичда шарноманинг алоҳида муҳим шартлари, тўлиқ тафсилоти ва бошқа маълумотлари акс эттирилади. Шартноманинг ушбу қисмида ҳам “Майдон қўшиш” тугмаси орқали қўшимча шарталарни қўшиш ёки бекор қилиш имконияти мавжуд. 

Мазкур банднинг сатрлари номаларини ҳам таҳрирлаш мумкин. 

Барча зарурий маълумотлар тўлдирилганидан сўнг “Сақлаш” тугмаси босилганда шартноманинг тайёр ҳолати экранда шаклланади. 

Шундан сўнг ушбу шартномани имзолаш ва жўнатиш ёки ўзгартириш мумкин.

Барча юборилган ва мижоз томонидан қабул қилинган шартномалар www.my.soliq.uz сайтидаги шахсий кабинетининг “Шартномаларни рўйхатга” олиш бўлими “Қабул қилинган” бандида акс эттирилади.