Аввалроқ коронавирус пандемияси туфайли юзага келган эпидемиологик вазиятни барқарорлаштириш мақсадида амалга киритилган чеклов чораларини яна маълум муддат давом эттиришга тўғри келмоқда.

Шу сабабли карантин талабларига қатъий риоя этилишини кучайтиришда замонавий ахборот коммуникация технологиялари ёрдамида давлат хизматларидан масофадан фойдаланишни кенгроқ ва кўпроқ йўлга қўйиш ҳаётий заруратга айланмоқда.

Шундан келиб чиқиб, давлат хизматларидан уйдан ёки офисдан туриб фойдаланишда талаб этиладиган электрон рақамли имзо калити билан боғлиқ масалаларни тезкор ва самарали ҳал этишга катта эътибор қаратилмоқда.

Хусусан, яқинда Давлат солиқ қўмитасининг рўйхатга олиш маркази карантин даврида муддати тугаган электрон рақамли имзо калитини интернет орқали реал вақт режимида янгилаш имкониятини жорий этган эди.

Ҳозирги шароитда  ғоят муҳим саналган бундай қулайлик ва енгилликлар шу билан кифояланиб қолаётгани йўқ, аксинча, уларнинг кўламини янада кенгайтириш давом эттирилмоқда.

Жумладан, Давлат солиқ қўмитаси ва Давлат хизматлари агентлиги томонидан жисмоний ва юридик шахсларга электрон рақамли имзо калити ва сертификатини махсус ахборот ресурси орқали бериш механизми жорий қилинди. Бунда ушбу давлат хизматидан мурожаат этувчи ҳали электрон рақамли имзо сертификатига эга бўлмаган ҳолларда хам фойдаланиши мумкин.

Хўш, масофадан туриб электрон калит беришда қандай қилиб мурожаат этувчилар идентификация қилинади?

Мурожаат этувчининг шахсини тасдиқлаш ва сўровномадаги маълумотлар тўғри тўлдирилганлигини текшириш Давлат хизматлари маркази оператори томонидан қуйидаги тартибда амалга оширилади:

- сўровномада кўрсатилган мобил телефон рақами мурожаат этувчига тегишлилиги;

- мурожаат этувчининг паспорт нусхаси ва селфи фото нусхаси орқали паспорт маълумотларининг тўғрилиги;

- мурожаат этувчининг СТИР орқали ДСҚ ахборот тизимидаги маълумотларни сўровномадаги маълумотлар билан солиштириш орқали текширади.

Мурожаат этувчининг шахсини тасдиқлашда селфи фото жуда муҳим ҳисобланади. Бунда, илова қилинаётган фотосурат нусхада мурожаатчи юз қиёфаси “анфас” шаклда ва тиниқ кўринган ҳамда паспортнинг асосий саҳифаси барча символлари ўқиб бўладиган сифатда бўлиши шарт.

Акс ҳолда сертификатни беришни рад этиш тўғрисидаги хабарнома берилади. Мурожаат этувчи рад этиш сабабларини бартараф этгандан сўнг, такроран мурожаат этиши мумкин.

Электрон рақамли имзони e-imzo.uz орқали масофадан олиш бўйича батафсил қўлланмани ушбу ҳавола орқали юклаб олишингиз мумкин.