Soliq xizmati organlari tomonidan “Soliqchi ko‘makchi” tamoyili asosida amalga oshirilayotgan chora-tadbirlar bozor ishtirokchilari orasida teng raqobat muhitini shakllantirib, qonuniy faoliyat olib borayotgan tadbirkorlarning uzluksiz ishlashlariga, soliq bazasi kengayishi va budjet tushumlariga ijobiy taʼsir ko‘rsatmoqda.

Davlat soliq qo‘mitasi tomonidan sinov tariqasida ishga tushirilgan “E-ombor” – tovar-moddiy resurslar harakatini hisobga olishning elektron axborot tizimi esa ushbu yo‘nalishdagi ishlarning navbatdagisi bo‘ldi.

Ushbu tizim mamlakatimiz Prezidentining joriy yil 2-iyulda “Davlat xaridlari shaffofligini taʼminlash va samaradorligini oshirishga doir qo‘shimcha chora-tadbirlar to‘g‘risida”gi PQ-5171-son qarorida belgilangan vazifalar ijrosi doirasida yaratildi.

“E-ombor(E-aktiv)” axborot tizimida mahsulotlar kirimi va qoldig‘i hisobini real vaqt rejimida shakllantirish va onlayn kuzatib borishi mumkin.  

Tadbirkorlar shaxsiy kabinetida “Mening omborlarim” bo‘limida o‘ziga tegishli mahsulotlar uchun bir yoki bir nechta ombor yaratish imkoniga ega. Ularda omborlar raqami, nomi, maydoni, manzili, yaratilgan sana, JSHSHIR (PINFL) va boshqa maʼlumotlar aks ettiriladi. Omborlarda mahsulotlar nomi, MXIK kodi, o‘lchov birligi miqdori va summasi aniq ko‘rsatiladi. Korxona shu asosda har bir ombordagi mahsulotlar taqsimotini belgilash, u yoki bu omborga olib o‘tishi mumkin.

Mahsulotlar kirimi va chiqimi, qoldig‘i, taqsimot jarayoni bir vaqtning o‘zida soliq organlari tomonidan ham kuzatib boriladi.

Yana bir eʼtiborli jihati, “E-ombor(E-aktiv)” axborot tizimi elektron hisobvaraq-faktura tizimizga integratsiya qilingan. Bunda mavjud mahsulotlarni realizatsiya qilishda elektron hisobvaraq-fakturada tovarlarning (ishlarning, xizmatlarning) identifikatsiyalash kodlari Mahsulotlar (tovar va xizmatlar) yagona elektron milliy katalogiga muvofiq aks ettirilishini hamda barcha shartnomalar Yagona elektron shartnomalarning axborot portalida majburiy tartibda ro‘yxatdan o‘tkazilishi taʼminlanadi.

Bu esa  tadbirkorlik subyektlari tomonidan kirim qilinmagan tovarlarni sotish bo‘yicha elektron hisobvaraq-fakturalarni rasmiylashtirish holatlarini bartaraf etadi.

Qarorda davlat xaridlarini amalga oshirish jarayonlari alohida tartibda nazorat qilinadigan 24 ta korporativ va 7 ta byudjet buyurtmachilari ro‘yxati tasdiqlangan.

Mazkur tizimning ishga tushirilishi tadbirkorlik subyektlariga bir qator qulayliklar yaratish bilan birga, tovarlar realizatsiyasi ustidan tizimli nazorat o‘rnatish, korporativ va byudjet buyurtmachilarida davlat xaridi tizimini yana-da takomillashtirish, korrupsiya omillarini bartaraf etish hamda yashirin iqtisodiyotni qisqartirishga xizmat qiladi.