Бугун, 27 август куни Давлат солиқ қўмитасида ютуқли чек ўйинларининг II тиражи ғолибларига совринлар топширилди.

Chevrolet Nexia 3 автомашинаси ва бошқа қимматбаҳо совғалар ўйини бир ҳафта аввал (19.08.2020 й.) жонли эфирда бўлиб ўтган эди. Бу галги ўйинда онлайн назорат-касса машиналари ва виртуал кассаларнинг икки баравар кўп чеклари иштирок этди. Ютуқли ўйинга Тошкент шаҳридаги савдо нуқталаридан берилган 20 мингга яқин QR кодли чеклар қабул қилинди.

Ютуқли чек ўйинларини ўтказиш ҳақидаги низомга мувофиқ, ҳар бир совриндорга ғолиб бўлганлиги ҳақида SMS хабарнома юборилди. Соврин иштирокчига шакли бузилмаган ҳақиқий чекни тақдим этганда берилади.

Совринларнинг омадли ғолиблари ўз таассуротлари билан ўртоқлашди:

Дилбар Бердиева, молия соҳаси мутахассиси (кир ювиш машинаси соҳибаси):

– Ўйин ҳақида июль ойида билган эдим, бештадан кўпроқ чекни рўйхатдан ўтказдим. Дастлабки тираж ғолибларини кўриб қизиқишим янада ортди. QR кодли чекларга кўпроқ эътиборли бўлдим. Ғолиб бўлганимдан жуда хурсандман – анчадан бери уй жиҳозларимни янгилашни хоҳлардим. Ва мана – омад!

Бобур Ғофуржонов, Сингапур менежментни ривожлантириш институти талабаси (дазмол соҳиби):

– Ютуқли чек ўйинларида иккинчи бор иштирок этяпман. Чин дилдан нимадир ютушни орзу қилардим. Бундан ташқари, барчаси қулай: Soliq иловасини юклаб оласиз, QR кодли чекларни сканерлайсиз ва иштироқчига айланасиз. Мен бўлажак тадбиркор сифатида фуқароларнинг савдо ва хизмат кўрсатиш соҳасидаги маданияти мамлакат учун қанчалик муҳимлигини тушунаман. Қачонки биз чекларни талаб қилсак, сотувчилар ҳам харидорлар олдида жавобгарликни ҳис қилади. Ютуғимни севимли бувижонимга ҳадя қиламан. У мени ҳар томонлама қўллаб-қувватлайди!

Марина Полозова, бухгалтер (газ плитаси соҳибаси):

– Мен Soliq иловасидан мунтазам фойдаланаман, Давлат солиқ қўмитасининг расмий каналларида солиқ соҳасидаги янгиликлар ҳақида ўқиб бораман. Ютуқли чек ўйинини ҳам шундан билдим ва омадимни синаб кўришга қарор қилдим. Мен доимий равишда маҳсулот сотиб оладиган савдо нуқтасида QR кодли чеклар берила бошланди.Чекларни рўйхатдан ўтказиш билан боғлиқ муаммолар бўлмади. Биринчи тиражда бир дона чекни рўйхатдан ўтказган эдим, иккинчисида эса кўпроқ. Ғолиб бўлганимдан жуда хурсандман!

Беҳзод Муҳамадиев, “Ўзбекчорванасл” агентлиги бош мутахассиси (телевизор соҳиби):

– Қиймати 6 000 сўм бўлган чек учун телевизор ютиб олганимга ҳеч ким ишонмади. Лекин бу ҳақиқат!

Ўйин бошиданоқ қизиқиш уйғотди. Мен рўйхатдан ўтказишнинг консерватив усулини афзал кўраман – чекнинг фискал белгисини 1077 рақамига SMS тарзида юборишни.

Агар омадингиз бўлса у кутилмаганда ва ростдан ҳам келади. Фақат энг яхши нарсаларга ишониш керак – шунда омад сизга кулиб боқади!

Ҳасан Бобониёзов, Тошкент молия институти битирувчиси (Chevrolet Nexia 3 автомобили соҳиби):

– Жудаям қизиққаним учун ютуқли чек ўйинларида иштирок этдим. Мен ҳар куни камида иккита QR кодли чекни сканер қилардим ва рўйхатдан ўтказдим, балки бу менинг ғалаба қозониш имкониятимни оширгандир. Ўзимнинг автомашинам борлиги учун, автомобилга умид қилмагандим. Энди бу ютуғимни турмуш ўртоғим Умидага совға қиламан. 31 август унинг туғилган куни. Бизнинг оиламиз учун бу кутилмаган ва ёқимли сюрприз бўлди. Ўйинда иштирок этишда давом этамиз.

 Эслатиб ўтамиз, ютуқли чек ўйинларининг III тиражи учун чекларни рўйхатдан ўтказиш давом этмоқда. Бош соврин – Chevrolet Nexia 3 автомобили!

Тақдирлаш маросимидан фотогалерея:

 ДСҚ матбуот хизмати