Бугун, 22 октябрь куни Давлат солиқ қўмитаси ютуқли чек ўйинлари IV тиражининг барча ғолибларига ўз совринлари топширилди.

Эслатиб ўтамиз, бир ҳафта аввал (14.10.2020 йил) ютуқли чек ўйинларининг IV тиражида Chevrolet Nexia 3 автомобили ва бошқа қимматбаҳо совғалар ғолиблари жонли эфирда аниқланган эди. Ушбу тиражда Тошкент шаҳридаги савдо нуқталарига ўрнатилган онлайн назорат-касса машиналари ва виртуал кассалардан берилган 45 мингдан зиёд чек рўйхатдан ўтказилди. Улар орасидан 20 нафар омадли чек соҳиби аниқланган эди.

Ютуқли чек ўйинларини ўтказиш ҳақидаги низомга кўра, жонли эфирдан сўнг ҳар бир совриндорга ғолиб бўлганлиги ҳақида SMS хабарнома юборилди. Совринлар шакли бузилмаган ютуқли чекнинг асл нусхасини тақдим этганларга берилди.

Муҳим: ютуқли чек ўйинлари инсонларга қувонч улашиш билан бир қаторда, истеъмол ва савдо маданиятини ошириш ва яширин иқтисодиёт улушини қисқартиришга хизмат қилмоқда. Истеъмолчиларга фуқаролик позициясини намойиш этиш ва ҳуқуқларини ҳимоя қилиш кўникмасини шакллантиришга ёрдам беряпти.

Ғолиблар ҳиссиётлари билан ўртоқлашамиз

Наталья Захаркевич, иқтисодиёт соҳаси мутахассиси (велосипед соҳиби): 

– Аслида лотерея ўйинларига унчалик аҳамият бермасдим. Кейинги ойларда АЁҚШ, дорихона ва бошқа савдо ҳамда хизмат кўрсатиш шохобчаларида онлайн касса чеклари бериш одат тусига кириб бормоқда. Бу, ушбу ноодатий ўйинда омадимни синаб кўришимга сабаб бўлди.

Ўйинни жонли эфирда томоша қилишни бошлаганимда, биринчи ютуқ менга чиқди. Бу – ҳақиқий омад! Aввалига бунга ишонолмадим, аммо ғолиблар рўйхати расман эълон қилингандан сўнг, жудаям хурсанд бўлдим. Ғолиб бўлишимдан аввал менга кўпчилик ишонмаган эди. Энди эса дўстларим ҳам, қариндошларим ҳам ютуқли чек ўйинларида иштирок этиш учун чекларни рўйхатдан ўтказишни бошлаб юборган. Ҳаммасидан ҳам ўғлим велосипеддан хурсанд!  

Отабек Юсупов, маданият ва санъат соҳаси мутахассиси (телевизор соҳиби): 

– Ютуқли ўйинлар ҳақида уйимиз ёнида жойлашган дорихонадаги стирекдан билдим. Қўлланмада кўрсатилганидек SOLIQ мобил иловасини юклаб олиб, чекларнинг QR кодини сканер қилишни бошладим. Телефонимга телевизор соҳиби бўлганим ҳақида SMS келганда худди ёш боладек хурсанд бўлдим. Бу менинг ҳаётдаги илк ютуғим бўлди. 

Гўзал Абдураҳмонова, Сергели меҳмонхона хўжалиги касб-ҳунар коллежи битирувчиси (кондиционер ғолиби): 

– Лотерея чипталарини сотиб олиш ёки қандайдир купонларни тўлдириш ўрнига яна қайси ўйинда чеклар билан иштирок этиш мумкин?! Турли савдо нуқталаридан берилган харид чеклари учун қимматбаҳо совринлар берилмоқда. Мен бор йўғи беш дона чекни рўйхатдан ўтказган эдим. Кўпроқ чекни рўйхатдан ўтказиш ғолиб бўлиш имкониятимни ошириши ҳақида ўйламагандим ҳам. Ютиб олган кондиционерни янги уйимизга ўрнатамиз ва у менинг омадли эканлигимни эслатиб туради.

Эркинхонов Саидолимхон, талаба (автомобил соҳиби): 

ؘ– Ютуқли чек ўйинларига мендан кўра, синглим кўпроқ қизиқди ва мени ўйинда иштирок этишга ундади. Телефонимга SOLIQ мобил иловасини юклаб олдим ва иккита чекнинг QR кодини сканер қилдим.

Ғолиб бўлганим ҳақида билганимдан сўнг, хушхабарни биринчи дадам билан бўлишдим. Ушбу автомобилни дадамга совға қиламан. Менинг бу қароримдан ойим ҳам жуда хурсанд бўлади, албатта. 

Владислав Кудинов, реклама менеджери (автомобиль соҳиби):

– Ютуқли чек ўйинлари ҳақида аввалроқ эшитгандим, аммо иштирок этмагандим. Бу гал таваккал қилишга ва омадимни синаб кўришга қарор қилдим. Савдо нуқталарида, дорихоналарда ва ёқилғи қуйиш шохобчаларида ҳар куни бериладиган чекларни рўйхатдан ўтказиш орқали ҳеч нарсани йўқотмайман деб ўйладим ва 26 та чекни рўйхатдан ўтказдим. Менга ўйин пайти жонли эфирдан қўнғироқ қилди ва автомобил ғолиби бўлганим ҳақида айтиб, мени табриклади. Тўғрисини айтсам, ўшанда ҳайратдан қотиб қолгандим. Мана бугун Chevrolet Nexia 3 автомобили калитини топширди. Мен кредитга машина олиш ҳақида ўйлаб юрган эдим.... Чекларни талаб қилинг, рўйхатдан ўтказинг ва мен каби автомобил ютиб олинг! 

Бугунги тақдирлаш маросимининг ўзига хос томони шундаки, ютуқли чек ўйинлари III тиражининг бош соврини ҳам тантанали равишда топширилди. Йўқотилган чек топилиб, ютуқли ўйин ташкилотчиларига тақдим этилди. Шундай қилиб, иккала Chevrolet Nexia 3 нинг бахтли эгаси ҳам бирваракаига ўз машиналарида уйларига йўл олди. 

 ДСҚ Матбуот хизмати