Ютуқли чек ўйинларининг навбатдаги тиражи ғолиблари Давлат солиқ қўмитасининг марказий аппаратига таклиф этилди. Эзгу анъанага мувофиқ уларга совринлар топширилди.

Эслатиб ўтамиз, иккинчи тираж 25 февраль куни «O‘zbekiston» телеканали орқали жонли эфирга узатилган эди. Унда 140 мингга яқин чек рўйхатдан ўтказилиб 25 та соврин ўз эгасини топди. Уларнинг 14 нафари Тошкент шаҳри истеъмолчилари бўлди. Иштирокчилар маиший техника, пул ютуқлари (2 млн сўм), санаторийга йўлланма, мобил телефон ва супер ютуқ – Chevrolet Spark автомобили соҳиби бўлди.

Самарқанд, Бухоро, Сирдарё, Хоразм, Сурхондарё ҳамда Навоий вилояти истеъмолчилари ҳам бахтли совриндорлар орасидан жой олди. Ютуқли чек ўйинларида мамлакатимизнинг барча ҳудудларида истиқомат қилувчи истеъмолчилар иштирок этиши мумкин.

Soliq, Payme ёки Click мобил иловаларида чек QR-кодини сканерлаш ёки 12 сондан иборат фискал белгисини 1077 рақамига SMS-хабар тарзида юбориш орқали рўйхатдан ўтказишда давом этинг. Барча рўйхатдан ўтказилган чеклар ҳақидаги маълумотлар фискал маълумотлар оператори сайти https://ofd.uz даги шахсий кабинетда сақланади. Қўшимча саволлар туғилганда https://t.me/ofdfmo, http://t.me/DSQ_Pressa манзили ёки (71) 202 32 82 ва 1198 қисқа рақамига мурожаат қилинг. 

Тантанали тақдирлаш маросимида ғолиблардан баъзилари таассуротлари билан ўртоқлашди:

Ольга Круглова, фарзанд парвариши билан банд (телевизор соҳибаси): 

– Ютуқли ўйинлар ҳақида январь ойида билдим. Солиқ инспекцияси ходими фуқароларга ўйин қоидаларини тушунтираётганини эшитдим. Бунга қизиқиб қолдим, ва турмуш ўртоғим билан биргаликда чекларни рўйхатдан ўтказишни бошладик. Ғолиб бўлганимни эшитганимда кўзларимга ишонолмадим. Рақамларни солиштириб кўргач, ишончим комил бўлди. Бу йил онамнинг юбилейини нишонлашни режалаштирганмиз. Мен буни онамга совға қиламан. Ҳозирча унга ғолиб бўлганимни айтмадим. Юбелийига қўшалоқ сюрприз қилмоқчиман.

Нилуфар Шамсиева, Тошкент тиббиёт академияси талабаси (пул мукофоти соҳибаси): 

– Мен ғолиб бўлишни ва турмуш ўртоғимни бу ўйин ҳаққоний эканлигига ишонтиришни жуда истаган эдим. Ютуқли ўйинга бўлган қизиқиш иқтисодий истеъмолчилик нормалар ҳақида билимларимни бойитди. Масалан, ўйинда иштирок этувчи чекда бизнес шаффофлигини исботловчи 12 сондан иборат фискал белги ва QR код мавжуд бўлиши шарт. Бундай чеклар биз, истеъмолчиларга, дорихоналарда, ёқилғи қуйиш шохобчаларида, алкоголь ва тамаки маҳсулотларини сотиш пунктларида, йирик савдо тармоқларида берилиши лозим. Бу иқтисодиёт ва давлат бюджети учун муҳим.

Даврон Исомиддинов, Тошкент педагогика университети битирувчиси (велосипед соҳиби): 

– Турмуш ўртоғим чек ўйинининг ҳақиқий ишқибози. Телефонига Soliq мобил иловасини юклаб олиб, 2020 йил биринчи тиражидан бошлаб харид ва хизматлар учун унга берилган барча чекларни рўйхатдан ўтказиб келади. Бу омадли чекни ҳам у рўйхатдан ўтказган. У болалардай хурсанд бўлиб кетди. «Ишонган ғолиб бўлади!» деб бежизга айтишмаган.

Равшан Толипов тадбиркор (Chevrolet Spark автомобили соҳиби):

– Чекларни рўйхатдан ўтказиш ҳақида ўтган ойда АЁҚШда эшитиб қолдим. Аввал бир марталик акция деб ўйладим. Кейин билдимки, бу Давлат солиқ қўмитасининг кенг кўламли ижтимоий лойиҳаси экан. Ўйин қоидаларини ўрганиб чекларни рўйхатдан ўтказишни бошладим. Жонли эфирдан қўнғироқ бўлганда ҳайрон қолдим. Ишонгим келмади, дўстларимнинг ҳазили деб ўйладим. Оила аъзоларим – турмуш ўртоғим ва уч нафар фарзандим ҳаммадан кўпроқ хурсанд бўлди. Биз жудаям бахтлимиз.

Чек учун автомобиль – бу ҳақиқат! Сиз ҳам ишонинг ва ғолиб бўлинг!

Бахтли лаҳзалар фоторепортажимизда акс эттирилган. 

ДСҚ Матбуот хизмати