9-dekabr – “Butunjahon korrupsiyaga qarshi kurashish kuni” munosabati bilan Soliq qoʻmitasida maʼrifiy tadbir oʻtkazildi.

Unda taʼkidlanganidek, mamlakatimizda korrupsiyaning oldini olish va unga qarshi kurashish, barcha sohalarda korrupsiyani keltirib chiqaradigan omillarga murosasiz munosabatni shakllantirishga qaratilgan keng koʻlamli islohotlar amalga oshirilmoqda.

Xususan davlat soliq xizmatini korrupsiyadan xoli tizimga aylantirish borasida faol ishlar olib borilmoqda. Soliq qoʻmitasining korrupsiyaga qarshi kurashish mexanizmlari ham xalqaro standartlarga moslashtirilgan. Sohada korrupsiyaga qarshi kurashish mexanizmi va faoliyatning ochiqligini taʻminlashga qaratilgan chora-tadbirlar ishlab chiqilib, izchillik bilan amalga oshirilmoqda.

Soliq qoʻmitasi markaziy apparati faoliyatining xalqaro standart talablariga muvofiqligini tekshirish natijalariga koʻra “CERT International” ixtisoslashtirilgan xalqaro tashkilotiga berilgan ISO37001:2016 xalqaro sertifikati shundan dalolat beradi.

Sohada korrupsiya holatlarini oldini olishda raqamli texnologiyalarning keng tatbiq etilishi muhim qadamlardan biri boʻldi. Soliq toʻlovchini hisobga olishdan tortib majburiyatini bajarishgacha boʻlgan jarayon avtomatlashtirildi.

Jumladan bugungi kunda tadbirkorlar hisobvaraq-fakturalarni 100% elektron shaklda rasmiylashtirmoqda. Bu hisobotlarni avtomatlashtirish darajasini oshirishda eng muhim vositadir. Mazkur elektron hujjatdagi barcha maʼlumotlar hisobotlarda avtomatik aks etadi. Buning natijasida QQS 93 %, yer, mol-mulk soliqlari hamda AOS hisoboti 100 % avtomatik ravishda shakllanyapti.

Raqamlashtirish – soha faoliyatining shaffof va ochiq-oydin boʻlishi, soliq toʻlovchilar bilan boʻladigan munosabatlarda inson aralashuvnini cheklash orqali korrupsion holatlarni keltirib chiqarishi mumkin omillarni bartaraf etish imkonini bermoqda.

Tadbirda Korrupsiyaga qarshi kurashish agentligi mutaxassisi Nodira Samandarova “Korrupsiyaga qarshi kurashish va uning oldini olish, kompleans-nazorat tizimi, manfaatlar toʻqnashuvini bartaraf etish masalalari” mavzusidagi maʼruza bilan ishtirok etdi.


Xususan korrupsiya holatlarini keltirib chiqaruvchi omillar, uning zararli oqibatlari va ularga nisbatan qonunchilikda belgilangan jazolar haqida taqdimot materiallari yordamida batafsil tushuntirib oʻtdi.

Korrupsiyaga qarshi kurashning xalqaro huquqiy asoslari, Oʻzbekiston tomonidan ratifikatsiya qilingan normativ-huquqiy hujjatlar va mamlakatimiz amal qilishi lozim boʻlgan talablar, hamkorlik oʻrnatilgan  xalqaro tashkilotlar haqida soʻzlab berdi.

Mamlakatlardagi korrupsiya darajasini va hukumatning jamiyat uchun ochiqligini xalqaro miqyosda baholovchi xalqaro reyting va indekslar haqidagi maʻlumotlar mazmunli boʻldi. Soliq qoʻmitasi xodimlari ushbu mavzu yuzasidan atroflicha javob oldilar.