Бизнесни муваффақиятли ривожлантириш учун доимо олдинга интилиш ва замонавий технология ютуқларидан, шу жумладан онлайн назорат-касса воситаларидан фаол фойдаланиш лозим. Мазкур техникалар савдо ва хизмат кўрсатишда истеъмолчилар билан ўзаро муносабатларга киришишда энг қулай ёрдамчи. Қисқа вақт ичида мижозлар сони ортишига хизмат қилади.

Назорат-касса машиналари хизматлар кўрсатиш ва товарларни сотиш учун тўловларни амалга оширишда фойдаланилади. Бажарилган операциялар тўғрисидаги маълумотлар қоғозда чоп этилади ва электрон шаклда ДСҚ базасига узатилади. Сўнгги олти ой давомида нақд пул тушумига эга бўлган тадбиркорлик субъектларининг онлайн назорат касса машиналари ёки виртуал кассадан фойдаланишга босқичма-босқич ўтказишнинг учинчи босқичи давом эттирилмоқда.

Ҳозирда ўтган йил якунлари бўйича йиллик обороти (тушуми) юз миллион сўмдан ошган ёки йил давомида ушбу чегаравий миқдорга етган тадбиркорлик субъектлари Онлайн-НКМ ёки виртуал кассадан фойдаланмоқда. 

2022 йилнинг 1 январидан барча тадбиркорлик субъектлари онлайн назорат-касса техникаларидан фойдаланишга ўтади.

29 июнь ҳолатига 140 мингга яқин савдо ва хизмат кўрсатиш субъекти 165 мингдан зиёд онлайн назорат-касса техникаларидан фойдаланмоқда.

Онлайн-НКМ ёки виртуал кассадан фойдаланишга ўтган тадбиркорлик субъектлари томонидан тўлов терминали орқали қабул қилинган тўловлар учун харидорларга тўлов терминали чеки билан бирга онлайн-НКМ ёки виртуал касса чеки ҳам берилиши шарт (пластик карточкалар орқали тўловларни ҳам қабул қилиш имкониятига эга бўлган онлайн-НКМ ёки виртуал кассалар бундан мустасно).(ВМҚ-943-сон, 6-банд. 23.11.2019 йил.)

Тадбиркорлик субъектлари ўз эҳтиёжлари ва имкониятларидан келиб чиққан ҳолда онлайн-НКМ ёки виртуал кассани танлаш ҳуқуқига эга. (ВМҚ-943-сон, 8-банд. 23.11.2019 йил.)

Онлайн назорат-касса техникаларининг тўлиқ жадвали фискал маълумотлар оператори сайти – ofd.uz да мавжуд:

Онлайн-НКМ реестри https://soliq.uz/page/davlat-reestri  

Виртуал касса реестри https://soliq.uz/page/virtual-kassa-reestri  

Рўйхатда мавжуд бўлмаган қурилмалардан Ўзбекистон ҳудудида фойдаланишга рухсат этилмайди.

Қурилмалар рўйхати 2021 йилда ҳам янгиланмоқда. Хусусан, онлайн-НКМ реестрига иккита модел («Uzkassa P100» ва «Sunmi P2») қўшилиб, уларнинг умумий сони 15 тага етди. Виртуал кассалар рўйхати 5 та янги дастурий маҳсул («Vipos», «Xpos», «I-cash» версияси 0.2, «Mobil kassa» ва «I-cash» версияси 4.08е) билан тўлдирилди. шу тариқа улар 16 та бўлди.

Бундан ташқари, онлайн НКМ ва виртуал кассаларга техник хизмат кўрсатиш марказлари (ТХКМ) сони ҳам ошиб бормоқда. Ҳозиргача, фойдаланувчиларга техник хизматлар кўрсатиш бўйича 26 та марказ рўйхатдан ўтган. ТХКМ реестрида улар билан батафсил танишиш мумкин https://soliq.uz/page/txkm-reestri.

Эслатиб ўтамиз, онлайн-кассага қўйиладиган техник талаблар орасида қоғозга босиб чиқаришдан олдин фискал маълумотларни текшириш ва акс эттириш учун камида TFT LCD 800*480 пикселлар сонига эга экран мавжудлиги бекор қилинган («Солиқ маъмуриятчилигини янада такомиллаштириш бўйича қўшимча чора-тадбирлар тўғрисида» ВМҚ 736-сон, 20.11.2020 йил).

Онлайн-НКМларга қўйилаётган талаблар ҳам такомиллаштирилмоқда:

– чек маълумотлари билан бирга жойлашган жойи бўйича геолокация маълумотларини операторга юбориш имконияти яратилди;

– онлайн-НКМлар 24 соат оффлайн режимида ишлагандан сўнг уларни автоматик блоклаш мумкин.

 Виртуал кассага оид ўзгаришлар:

– виртуал кассага ўзгартириш ва қўшимчалар киритилиши мумкин;

– фискал маълумотлар, шунингдек, уларни операторга юборишда ўзгартириш ва қўшимчалар киритилган тақдирда оператор ва киберхавфсизлик марказидан қайта хулоса олиниши шарт;

– электрон тижорат орқали фаолият юритувчи тадбиркорлик субъектлари фискал маълумотларни операторга узатишни Давлат солиқ қўмитаси томонидан ишлаб чиқилган виртуал касса дастурий маҳсулоти орқали амалга ошириши мумкин.