Ўзбекистон Президентининг 2019 йил 6 сентябрдаги ПФ-5813-сон Фармонига кўра, 2020 йилдан савдо (хизмат кўрсатиш) шохобчаларида аҳоли билан нақд пулда ва (ёки) банк пластик карталари орқали амалга оширилган ҳисоб-китобларда онлайн назорат-касса ва виртуал кассалардан фойдаланиш жорий этилмоқда. Фармонда:

- алкоголь ва тамаки маҳсулотлари, дори воситалари, бензин, дизель ва газ ёқилғиси савдоси билан шуғулланувчи тадбиркорлик субъектлари 2020 йил 1 январдан;

- ўтган йил якуни бўйича йиллик тушими 5 миллиард сўмдан ошган ёки йил давомида  мазкур чегаравий миқдорга етган тадбиркорлик субъектлари 2021 йил 1 августдан;

- йиллик обороти (тушуми) юз миллион сўмдан ошган ёки йил давомида ушбу чегаравий миқдорга етган тадбиркорлик субъектлари 2020 йил 1 январдан;

- қолган барча турдаги тадбиркорлик субъектлари 2022 йил 1 январдан янги турдаги онлайн касса аппаратларидан фойдаланиш тизимига ўтиши белгиланган.

Онлайн касса техникалари бир вақтнинг ўзида амалга оширилган савдо операцияси тўғрисидаги маълумотларни давлат солиқ хизмати органларига онлайн режимида узатиб бориш функциясига эга.

Мазкур ҳужжат ижросини таъминлаш мақсадида Вазирлар Маҳкамасининг 2019 йил 23 ноябрдаги 943-сон қарорида онлайн назорат-касса машиналарини қўллаш тартиби белгилаб қўйилди.

Бугунги кунда республика бўйича жами 24,4 мингта тадбиркорлик субъектларида ушбу тизим жорий этилди.

Аҳоли мурожаатлари ва солиқ органлари томонидан тизимнинг ишлаш жараёнларини ўрганишда онлайн назорат-касса машиналарини қўллаш тартибига тўлиқ риоя қилинмаслик ҳолатлари ҳам учрамоқда.

Ҳозиргача, жами 13,4 мингта ана шундай ҳолатлар аниқланган: Самарқандда 1 749 та, Андижонда 1 266 та, Бухорода 1 150 та, Тошкент вилоятида 1 372 та, Жиззахда 629 та, Сурхондарёда 884 та ва Сирдарёда 415 та тадбиркорлик субъекти ушбу тизимдан тўлақонли фойдаланмаган.

Фаолиятига янги дастурий маҳсулотни жорий этиши зарур бўлган 18,2 мингта тадбиркорлик субъектлари эса ҳамон эски фискал хотирали НКМлардан фойдаланишда давом этмоқда. Жумладан, Тошкент шаҳрида 3 125 та, Самарқандда 1 801 та, Фарғонада 1 545 та, Тошкент вилоятида 1 662 та, Наманганда 1 233 та, Бухорода 1 239 та ва Қорақалпоғистонда 1 056 та ҳолат аниқланган.

Эслатиб ўтамиз, Солиқ кодексининг 221-моддасига кўра:

- назорат-касса техникаси ва (ёки) ҳисоб-китоб терминалларини қўлламасдан савдони амалга оширганлик ва хизматлар кўрсатганлик;

- сотиб олувчига квитанциялар ёзиб бериш, талонларни, чекларни ёки уларга тенглаштирилган ҳужжатларни бермасдан товарларни реализация қилганлик ва хизматлар кўрсатганлик;

- ҳисоб-китоб терминаллари орқали тўловларни қабул қилишни рад этганлик беш миллион сўм миқдорида жарима солишга сабаб бўлади.

Солиқ органларида рўйхатга олинмаган назорат-касса техникасини қўллаган ёки сотиб олувчига квитанциялар, талонлар, чеклар ёки уларга тенглаштирилган ҳужжатларни берган ҳолда савдони амалга оширганлик ва (ёки) хизматлар кўрсатганлик етти миллион сўм миқдорида жарима солишга сабаб бўлади.

Бошқа шахслар номига расмийлаштирилган ҳисоб-китоб терминалларидан солиқ тўловчи томонидан фойдаланилиши ва техник талабларга мувофиқ бўлмаган ёки хизмат кўрсатиш дастури бузилган назорат-касса техникаларидан фойдаланганлик йигирма миллион сўм миқдорида жарима солишга сабаб бўлади.

Ҳурматли тадбиркорлар,

онлайн назорат-касса машиналаридан белгиланган тартибда фойдаланиш ҳамда эски фискал хотирали НКМларни солиқ идораларидан рўйхат чиқаришингиз сўраймиз.

Давлат солиқ қўмитаси Матбуот хизмати