Oʻzbekiston Respublikasi Prezidentining “Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti qoshida Alkogol va tamaki bozorini tartibga solish inspeksiyasi faoliyatini tashkil etish toʻgʻrisida”gi  qarori qabul qilindi. PQ-204-son, 03.06.2024-y.

Ushbu hujjatga muvofiq, Soliq qoʻmitasiga quyidagi vazifalar belgilab berildi:

a) Raqamli texnologiyalar vazirligi, “Asl belgisi” axborot tizimi operatori bilan birgalikda “Asl belgisi” axborot tizimi maʼlumotlari asosida raqamli markirovkalangan mahsulotlarni tizimga kiritish, ularning harakatini avtomatlashtirilgan tarzda tahlil va nazorat qilish imkonini beruvchi dasturiy mahsulot ishlab chiqish. 

Shuningdek, “Asl belgisi” axborot tizimini quyidagi yoʻnalishlarda takomillashtirish:

ishlab chiqarilgan va realizatsiya qilingan raqamli markirovkalangan mahsulotlarning hisobini toʻgʻri yuritish hamda mahsulotlar harakati zanjirini axborot tizimida toʻliq va haqqoniy aks ettirish;

mahsulotlarning hisobini toʻgʻri yuritish hamda mahsulotlar harakati zanjirini axborot tizimida toʻliq va haqqoniy aks ettirish maqsadida raqamli markirovkalangan mahsulotlar aylanmasi ishtirokchilarining aniq faoliyat manzili, shu jumladan, mahsulotlarni ishlab chiqarish, saqlash va realizatsiya qilish manzillari hisobini toʻgʻri yuritish;

shubhali holatlarni aniqlash va bunday maʼlumotlarni soliq, organlariga avtomatlashtirilgan tarzda taqdim etish;

6) Raqamli texnologiyalar vazirligi va Adliya vazirligi bilan birgalikda litsenziya (ruxsat etish, xabarnoma hujjati), raqamli markirovka  kodlarini toʻgʻri  oʻqishni va aniqlashni taʼminlovchi maxsus qurilmalar mavjudligi, “Asl belgisi” axborot tizimida roʻyxatdan oʻtganligi hamda raqamli markirovka kodlari toʻgʻri aks ettirilishini EHFda avtomatik tekshirish tizimini joriy etish.

Maʼlumot uchun: “Asl belgisi” mahsulotlarni markirovkalash va kuzatib borish milliy axborot tizimi. Tizimning asosiy vazifalari quyidagilar:

mahsulot aylanmasi yuzasidan barcha bosqichlarni roʻyxatdan oʻtkazish orqali identifikatsiya vositalari yordamida markirovka qilinishi lozim boʻlgan mahsulotlar aylanmasi toʻgʻrisidagi maʼlumotlarni yigʻish va qayta ishlashni avtomatlashtirish;

maʼlumotlarni saqlash, olish, oʻtkazish, tarqatish, qayta ishlash, nashr etish, foydalanish va “Asl belgisi” MAT egasi yoki u tomonidan jalb qilingan shaxsning boshqa harakatlariga hamda mazkur maʼlumotlarni himoyalash rejimiga nisbatan Davlat soliq qoʻmitasi tomonidan tasdiqlanadigan tartibda talablar belgilash orqali saqlanadigan maʼlumotlarning cheklanganligini taʼminlash.

Soliq solish metodologiyasi boshqarmasi