Hurmatli kasaba uyushmalari faollari va aʼzolari!

Sizlarni, sizlar orqali barcha kasaba uyushmalari aʼzolarini “Oʻzbekiston kasaba uyushmalari kuni” bayrami bilan chin qalbimdan samimiy tabriklab, eng ezgu niyat va tilaklarimni bildiraman.

Bugungi kunda kasaba uyushmalari jamiyatimizning muhim bir boʻgʻiniga aylangan eng yirik jamoat tashkiloti sifatida eʼtirof etilayotgani ham ayni haqiqat.

Oʻzbekiston kasaba uyushmalari Federatsiyasining sakkizinchi Qurultoyi zarhal harflar bilan bitiladigan qator voqeliklarga boy tarzda tarixga kirdi va unda ilk bor davlatimiz rahbarining delegatlarga tabrigi yoʻllandi.

Oʻzbekiston Respublikasi Prezidenti Sh.Mirziyoyev yoʻllagan tabrigida  soʻnggi 5 yilda kasaba uyushmalari tizimida keng koʻlamli chora-tadbirlar amalga oshirilganligini, mehnat jamoalarida xodimlarni ijtimoiy-iqtisodiy qoʻllab-quvvatlash ishlari yangi bosqichga koʻtarilganligini, mamlakatimizdagi eng yirik fuqarolik instituti boʻlgan kasaba uyushmalarining oʻrni va roli oshib borayotgani alohida eʼtirof etildi.

Oʻzbekiston tarixida birinchi marotaba 11-noyabr – “Oʻzbekiston kasaba uyushmalari kuni” etib belgilandi.

Oʻzbekiston Respublikasining “Kasaba uyushmalari toʻgʻrisida”gi  yangi qonunining qabul qilinishi va boshqa qator nufuzli tuzilmalar bilan yaqin aloqalarning yoʻlga qoʻyilayotgani, aholining mehnat huquqlari va ijtimoiy himoyasini taʼminlashda kasaba uyushmalari Hukumatning teng huquqli hamkoriga aylanayotganligi, bularning barchasi Oʻzbekiston kasaba uyushmalari faoliyatining butunlay yangi bosqichga koʻtarilganining dalolatidir.

Maʼlumki, 2020-yilda xodimlarning mehnatga oid huquqlarini demkoratik tamoyillar asosida himoya qilish, ularga teng sharoit yaratish maqsadida, Davlat soliq qoʻmitasi va uning tarkibiy boʻlinmalari birlashgan kasaba uyushmasi qoʻmitasi tashkil etilib, Toshkent shahri va Toshkent viloyatidagi 45 ta davlat soliq xizmati organlarining  boshlangʻich kasaba uyushmalari birlashtirildi. Amalga oshirilgan ishlar natijasida Davlat soliq qoʻmitasi birlashgan kasaba uyushmasi qoʻmitasining 4167 nafar aʼzolarining ijtimoiy-iqtisodiy, huquqiy manfaatlarini yuzaga chiqarish yangicha formatda takomillashtirildi.

Bu boradagi erishilgan ijobiy natijalardan soʻng hududiy davlat soliq organlari viloyatlardagi ishchi xodimlarining taklifiga viloyat davlat soliq boshqarmalarida ham Birlashgan kasaba uyushmalari qoʻmitalari tashkil etilib, Respublikaning 12 ta hududidagi 171 ta boshlangʻich tashkilot Birlashgan kasaba uyushmasi qoʻmitasiga birlashtirildi. Bu bilan, hududiy davlat soliq organlaridagi 8741 nafar xodimlarning mehnat hamda boshqa ijtimoiy-iqtisodiy huquq va manfaatlarini yoqlab chiqish va himoya qilish bir tizimga keltirildi.

Ayni paytda Davlat soliq qoʻmitasi tizimi 13 ta Birlashgan kasaba uyushmasi qoʻmitalari safida jami 12908 nafardan ziyod aʼzolarni birlashtirib, ularning kasbiy, mehnatga oid, ijtimoiy-iqtisodiy, huquq va manfaatlarini taʼminlash, munosib mehnat sharoitlarini yaratish borasida ish beruvchilar bilan samarali hamkorlik olib borayotgani fikrimiz tasdigʻidir.

Jumladan, Oʻzbekiston Respublikasi Davlat soliq qoʻmitasi hamda Oʻzbekiston davlat muassasalari va jamoat xizmati xodimlari kasaba uyushmasi Respublika Kengashi oʻrtasida 2021-2023-yillarga moʻljallangan Tarmoq kelishuvi imzolangan.

Davlatimiz rahbarining kasaba uyushmalari haqidagi “Har qaysi korxona yoki tashkilotda albatta kasaba uyushmasi faoliyat koʻrsatishi va rahbarlar albatta ular bilan yaqin hamkorlikda ish olib borishi shart. Shundagina jamiyatimizda mehnat qonunchiligi buzilishi holatlarining oldi olinadi, hayotimizda ijtimoiy adolat yanada mustahkam qaror topadi” deb taʼkidlagan fikrlaridan kelib chiqib, biz bu yoʻlda ijtimoiy sheriklikni yanada rivojlantirish, tarmoq (tarif) kelishuvlari va jamoa shartnomalari taʼsirchanligini oshirish borasidagi faoliyatimizni yanada oshirishga qaratilgan ishlarni izchil davom ettiramiz.

Kasaba uyushmalarining munosib mehnat sharoitlarida mehnat qilish, ish haqi, bandlik, xodimlar va ularning oila aʼzolarini sogʻlomlashtirish, maʼnaviy-maʼrifiy ishlar samaradorligini oshirish, respublikamizdagi diqqatga sazovor qadamjolarga sayohatlar tashkil etish, yozgi mavsumda bolalarning oromgohlarda dam olishlarini tashkillashtirish, xalqaro hamkorlik aloqalarini mustahkamlash hamda taʼsirchan jamoatchilik nazoratini oʻrnatishga oid tashabbuslarini qoʻllab-quvvatlaymiz.

Sizlarni bugungi  ayyom – Kasaba uyushmalari kuni bilan samimiy qutlab, barchangizga sihat-salomatlik, masʼuliyatli va xayrli ishlaringizda zafarlar tilayman.

Xonadonlaringizni tinchlik-xotirjamlik, fayzu baraka, baxt va omad hech qachon tark etmasin! 

Oʻzbekiston Respublikasi Davlat soliq qoʻmitasi raisi Sh.D.Kudbiyev