Joriy yilning 5-may kuni “O‘zbekiston Respublikasining Soliq kodeksiga o‘zgartish va qo‘shimchalar kiritish to‘g‘risida”gi O‘RQ-767-sonli Qonun imzolandi. 

Unga ko‘ra: 

- Mol-mulk va yer soliqlaridan to‘liq ozod qilingan yuridik shaxslar ushbu soliqlardan hisoblangan summaning 1%ini to‘laydi (ushbu tartib 3 oydan so‘ng kuchga kiradi).

- Foyda solig‘i to‘lovchilari tomonidan "Bolalarni qo‘llab-quvvatlash jamoat fondi"ga xayriya qilingan mablag‘lar foyda solig‘ini hisoblashda chegiriladigan harajatlar sifatida tan olinadi.

- Bolalikdan nogironligi bo‘lgan shaxslar, shuningdek I va II guruh nogironligi bo‘lgan shaxslarning daromad solig‘i soliq solinmaydigan mablag‘lari miqdori MHTEKMning 1,41 baravaridan 3 baravariga oshirildi (ushbu imtiyoz 01.03.2022-yildan yuzaga kelgan munosabatlarga ham tatbiq etiladi).

- Yangi barpo etilayotgan bog‘lar, tokzorlar va tutzorlar egallagan yerlar uchun yuridik shaxslardan olinadigan yer solig‘i bo‘yicha imtiyoz muddati 3 yildan 5 yilga uzaytirildi (ushbu imtiyoz 01.01.2022-yildan yuzaga kelgan munosabatlarga ham tatbiq etiladi).

- O‘simlik yog‘i, kungaboqar va zig‘ir urug‘i, shuningdek soya danagini olib kirish, shuningdek o‘simlik yog‘ini (paxta yog‘idan tashqari) ishlab chiqarish va (yoki) realizatsiya qilish bo‘yicha aylanmani QQSdan ozod qilish bo‘yicha imtiyoz muddati 31.12.2022 yilga qadar uzaytirildi (ushbu imtiyoz 01.05.2022-yildan yuzaga kelgan munosabatlarga ham tatbiq etiladi).

Go‘shtni (mol va qo‘y go‘shtini), tirik hayvonlarni (molni va qo‘yni) hamda ularni so‘yishdan olingan mahsulotlarni, kartoshkani realizatsiya qilish bo‘yicha aylanma, shuningdek O‘zbekistonga olib kirishda QQSdan ozod qilish muddati 31.12.2022 yilgacha uzaytirildi (ushbu imtiyoz 01.05.2022 yildan yuzaga kelgan munosabatlarga ham tatbiq etiladi). 

Tovuq go‘shtini, muzlatilgan baliqni va tirik parrandani QQSdan ozod qilish bo‘yicha imtiyoz muddati 30.04.2022 yilgacha o‘zgartishrishsiz qoldirildi.

Eslatma! Mazkur imtiyoz O‘RQ-752-son Qonun bilan 30.04.2022-yilgacha berilgan edi. 

- Mo‘ynoq tumanidagi mahalliy sanoat, qishloq xo‘jaligi va xizmatlar sohalaridagi tadbirkorlik subyektlari 01.01.2022 yildan 01.01.2031 yilga qadar:

• foyda solig‘ini, aylanmadan olinadigan soliqni, ijtimoiy soliqni va daromad solig‘ini 1% miqdorida to‘laydi;
  
• yuridik shaxslarning mol-mulk va yer solig‘i hamda suv resurslaridan foydalanganlik uchun soliqni mazkur soliqlar bo‘yicha hisoblangan summaning 1%i miqdorida to‘laydi (ushbu imtiyoz 01.01.2022 yildan yuzaga kelgan munosabatlarga ham tatbiq etiladi).
  

- Bo‘yalgan matoni, bo‘yalgan gazlamani va tayyor tikuv-trikotaj mahsulotini eksport qiluvchi tadbirkorlik subyektlari 01.02.2022-yildan 01.01.2025 yilgacha ijtimoiy soliqni 1 % to‘laydi.