9-sentabr kuni Rossiya Federatsiyasi Hukumati Raisi Mixail Mishustin boshchiligidagi delegatsiya rasmiy tashrif bilan Oʻzbekistonga keldi. Tashrif davomida tibbiy maqsadlarda foydalaniladigan dori vositalarining markirovkalash kodlari toʻgʻrisidagi maʼlumotlarni almashish boʻyicha oʻzaro axborot hamkorligi  toʻgʻrisida bitim imzolandi.

Bitimning asosiy maqsadi - ikki davlatda dori vositalarining markirovkasini oʻzaro tan olish tizimini amaliyotga tatbiq etish uchun huquqiy asos yaratish va ikki davlat hududida markirovkalangan dori vositalarining muomalasi boʻyicha maʼlumotlar almashinuvi mexanizmini joriy etishdan iborat.

Shartnoma imzolanishi quyidagilarga imkon beradi:

• dori vositalarini ikki davlatdan oʻzaro eksport/import qilishda ularni qayta markirovkalash boʻyicha ishlab chiqaruvchilarning xarajatlarini kamaytirish va dori vositalari tannarxini kamaytirish hamda ularning aholi uchun arzonlashuvi ;
• eksport rejimida dori vositalarini ikki davlat hududidan olib chiqish  vaqtini qayd etish;
• eksport rejimida ikki davlat hududida dori vositalarining xatto davlat chegarasini kesib oʻtishdan oldingi harakatini kuzatish (qoʻshimcha protokol doirasida ishlab chiqilishi rejalashtirilgan).

Ma'lumot uchun. Oʻzbekistonda 2024-yilda atiga 519,4 million dona markirovkalangan dori vositalari realizatsiya qilingan. Shundan import ulushi 290,7 million donani (56 foiz) tashkil etgan, Rossiya Federatsiyasidan faqat 87,8 million dona (umumiy import ulushining 30,2 foizi) markirovkalangan dori vositalari olib kelingan.

Markirovkalash kodlarini tanib olish tizimini joriy etish boʻyicha texnik ishlar “Asl belgisi” (Oʻzbekiston) va “Честный знак” (Rossiya) Axborot tizimi operatorlari tomonidan 2023-yilda toʻliq tugallangan.

Shartnomani tuzilishi davlat budjetiga hech qanday xarajatlarni keltirib chiqarmaydi.

10-sentabr kuni Soliq qoʻmitasi raisi Sherzod Kudbiyev Rossiya Federal soliq xizmati rahbari Daniil Yegorov bilan uchrashdi.

Sh.Kudbiyev Soliq qoʻmitasining avtomatlashtirilgan axborot tizimlari bilan tanishtirdi va u yoki bu  faoliyat boʻyicha vizual tahliliy hisobotlarni shakllantirish  imkonini beruvchi maʼlumotlarni yigʻish va vizualizatsiya qilishning zamonaviy vositalarini (dashbordlar) joriy etish boʻyicha tajribasi bilan oʻrtoqlashdi.

Yakunda tomonlar hamkorlikni yanada rivojlantirish masalalarini muhokama qildilar.