2019 йил 9 декабрь куни Олий Мажлис Қонунчилик палатаси томонидан “Ўзбекистон Республикасининг Солиқ кодексига ўзгартиш ва қўшимчалар киритиш тўғрисида”ги қонун лойиҳаси иккинчи ўқишда қабул қилинди.

Янги таҳрирдаги Солиқ кодексининг ишлаб чиқилиши ва қабул қилиниши бугунги давр талабларига жавоб берадиган янги замонавий солиқ тизимини шакллантириш ва ривожлантириш йўлидаги муҳим қадамдир.

Маълумки, Президентимизнинг 2018 йил 29 июндаги “Ўзбекистон Республикасининг солиқ сиёсатини такомиллаштириш концепцияси тўғрисида”ги Фармонида солиқ юкини изчиллик билан камайтириш, солиқ солиш тизимини соддалаштириш, солиқ маъмуриятчилигини такомиллаштириш ҳамда бир қатор тизимли муаммоларни ечиш масалаларига алоҳида эътибор қаратилган эди.

Давлатимиз раҳбарининг 2018 йил 28 декабрда Олий Мажлисга қилган Мурожаатномасида янги таҳрирдаги Солиқ кодексида мамлакат тараққиётининг таянчи бўлган инсофли солиқ тўловчиларни рағбатлантириш, яширин фаолият юритаётганларнинг қонуний фаолият юритиши учун шарт-шароитлар яратиш шартлигини айтиб ўтган эди.

Шу жиҳатдан Кодекс хуфиёна фаолият юритаётганларга қарши қатъий чораларни қўллашга қаратилган. Бунда фуқароларимиз солиқдан қочиш эмас, балки уни вақтида тўлашдан манфаатдор бўлишлари керак.

Айнан шу жиҳатлар янги Солиқ кодекси лойиҳасида инобатга олинган. Янги солиқ тизимини яратишда тенглик, соддалик, аниқлик ва самарадорлик каби асосий принципларга асосланилди. Ўтган давр мобайнида лойиҳа кенг муҳокама қилиниб, маромига етказилди.

Янги таҳрирдаги Солиқ кодекси лойиҳаси юзасидан Давлат солиқ қўмитаси, Молия вазирлиги мутасаддилари, парламент қуйи палатасининг Бюджет ва иқтисодий ислоҳотлар қўмитаси аъзолари, Давлат бюджети бошқармаси ходимлари ва бошқа мутахассислар иштирокида жуда кенг ва қизғин муҳокамалар ўтказилди.

Шу билан бирга, лойиҳа юзасидан қатор ташкилот ва муассасаларда ҳам мутахассислар, экспертлар, илмий доиралар вакиллари, тадбиркорлик субъектлари иштирокида муҳокама ҳамда таҳлиллар ўтказилди. Муҳокамалар ҳудудларда ҳам ташкил этилиб, республикамизнинг барча вилоятларида маҳаллий кенгашлар депутатлари, мутасаддилар, мутахассислар, экспертлар, тадбиркорлар, йирик солиқ тўловчилар иштирокида кенг жамоатчиликни жалб қилган ҳолда, туркум семинарлар ташкил этилди.

Ушбу тадбирларда лойиҳанинг ҳар бир нормаси иқтисодиётнинг барча жабҳасида макроиқтисодий барқарорликка эришиш, пировардида, мамлакат ривожи ҳамда халқ манфаатлари устуворлигини таъминлаш нуқтаи назаридан кўриб чиқилди. Мақсад – кодекс лойиҳасидаги ҳар бир норманинг амалиётда тўғридан-тўғри ишлашини таъминлаш, унинг халқчиллигини оширишдан иборатдир.

Бундан ташқари, ушбу янгиликни тадбиркорлар ва бизнес вакиллари анчадан бери кутаётган эди. Шу боис кўплаб экспертлар солиқларни ҳисоблаш ва тўлаш механизмини такомиллаштиришга қаратилган нормалар лойиҳадан ўрин олганини эътироф этмоқда.

Янги таҳрирдаги Солиқ кодекси ҳаволаки нормалар, қонуности ҳужжатларини максимал даражада камайтирган ҳолда, тўғридан-тўғри амал қиладиган ҳужжат сифатида қабул қилинмоқда.

Умуман олганда, янги таҳрирдаги Солиқ кодекси тўғрисидаги қонун лойиҳасини иккинчи ўқишда тайёрлаш жараёнида жуда катта ҳажмли иш бажарилди. Лойиҳа барча иштирокчиларнинг муҳокамаларда билдирилган фикр-мулоҳазалари ва таклифлари асосида ҳар томонлама пишиқ-пухта ҳолга келтирилди.

9 декабрь куни қизғин кечган савол-жавоб ва тортишувлардан сўнг лойиҳа овозга қўйилди ва “Ўзбекистон Республикасининг Солиқ кодексига ўзгартиш ва қўшимчалар киритиш тўғрисида”ги Қонун қабул қилинди.