Давлат солиқ қўмитасининг қарори билан солиқ органларида қўшилган қиймат солиғи тўловчилари сифатида махсус рўйхатдан ўтказиш тартиби тўғрисидаги Низом тасдиқланди (02.05.2020 йилда 3232-сон билан рўйхатдан ўтказилган).

 Ушбу Низом солиқ тўловчиларни солиқ органларида ҳисобга олишнинг ягона автоматлаштирилган тизимида қўшимча қиймат солиғи тўловчилари сифатида мажбурий ёки ихтиёрий равишда рўйхатдан ўтказишни назарда тутади.

ҚҚС га ўтган солиқ тўловчилар ушбу солиқ тўловчилари сифатида солиқ органларида рўйхатдан ўтишлари лозим, бу ҚҚС суммасини ҳисобга олишнинг муҳим шартидир.

Рўйхатдан ўтказиш тўғрисидаги ариза солиқ органлари томонидан солиқ тўловчининг аризаси келиб тушган кундан эътиборан 5 кун ичида кўриб чиқилади ва ҚҚС тўловчисини ҳисобга олиш тўғрисида тегишли қарор қабул қилинади, шундан сўнг Давлат солиқ қўмитаси томонидан тасдиқланган шаклдаги Гувоҳнома расмийлаштирилади.

Солиқ тўловчи ҚҚС тўловчиси сифатида рўйхатдан ўтказилганидан сўнг, унга тизим орқали автоматик равишда ҚҚС тўловчисининг рўйхат рақами берилади.

Гувоҳномадаги ҚҚС тўловчисининг рўйхат рақами ҳисобварақ-фактура ёки унинг ўрнини босувчи бошқа ҳужжатларни расмийлаштириш ва фойдаланишда кўрсатилиши мажбурий ҳисобланади.

Низомда шунингдек, ҚҚС тўловчисининг Гувоҳномаси қандай ҳолатларда бекор қилиниши мумкинлиги белгиланган. Хусусан, агар солиқ тўловчи суд томонидан сохта тадбиркорлик билан шуғулланган деб эътироф этилса, у ҳисобдан чиқарилади.

Шу билан бирга, мазкур Низомда ҚҚС тўловчиларини рўйхатга олиш ва уларнинг ягона ҳисоби юритилишини таъминлаш мақсадида, ҚҚС тўловчиларининг ягона реестрини юритиб бориш назарда тутилган. Барча солиқ тўловчиларга реестрдан эркин фойдаланиш имконияти яратилади.

Мазкур чоралар сифатли ҳисобга олиш ва бизнесни юритишда шаффофликни таъминлашга хизмат қилади.

Давлат солиқ қўмитаси

Матбуот хизмати