Бугун, 22 сентябрь куни Давлат солиқ қўмитаси ютуқли чек ўйинлари III тиражи ғолибларига совринлар топширилди.

Эслатиб ўтамиз, Chevrolet Nexia 3 автомобили ва бошқа қимматбаҳо совринлар ўйини бир ҳафта аввал (16.09.2020 йил) жонли эфирда ўтказилган эди. Навбатдаги тираж рекорди билан эсда қолди: онлайн назорат-касса машиналари ва виртуал кассалардан берилган 30 мингдан зиёд чек рўйхатдан ўтказилди. Улар орасидан 20 нафар омадли чек соҳиблари аниқланди.

Ўйиндан сўнг ҳар бир ютуқли чек соҳибига ғолиб бўлганлиги ҳақида SMS хабарнома юборилди. Ютуқли чек ўйинларини ўтказиш ҳақидаги низомга мувофиқ, совринлар шакли бузилмаган ҳақиқий чекни тақдим этган иштирокчиларга берилди.

 Совғаларнинг бахтли соҳиблари қувончли ҳиссиётлари билан ўртоқлашди. 

Райхона Зуфарова 307-мактаб ўқувчиси (кир машинаси соҳибаси): 

– Ютуқли чек ўйинлари ҳақида опамдан эшитдим. У буни ижтимоий тармоқларда ўқиган экан. Оила аъзоларимиз уйга олиб келган ҳар бир чекнинг QR кодини Soliq мобил иловаси орқали сканер қилиб рўйхатдан ўтказдим. Ғолиб бўлишимга ишонмагандим. Ҳозир жудаям хурсандман. Вояга етмаганим учун ота-онам билан келдим. Улар барчадан кўпроқ хурсанд бўлди. Ота-онам ўйин адолатли тарзда ўтказилаётганига ишонч ҳосил қилди ва ютуқли ўйинда иштирок этишда давом этмоқда. 

Ольга Синеговец, иқтисодчи (газ плитаси соҳибаси):

Ютуқли чек ўйинларида биринчи тираждан бошлаб иштирок этяпман. Фақат ғалаба учун эмас кўпроқ қизиққаним учун ўйнаяпман. Тасаввур қилинг, мен бор-йўғи саккизта чек рўйхатдан ўтказдим ва газ плитаси ютиб олдим. Мен катта мамнуният билан ота-онамнинг уй жиҳозларини янгилайман. Ҳурсандчилигимни мен барча қариндошларим, дўстларим ва танишларим билан бўлишдим. Бу ҳақда уларга гапириб бердим – улар ҳам чекларни талаб қилсин, қатнашсин ва ғолиб бўлсин.

Вера Баскакова, ҳисобчи (велосипед соҳибаси):

– Ютуқли чек ўйинларига қизиқишим туфайли барча дорихоналарда, АЁҚШ ва спиртли ичимликлар савдо шохобчаларида QR кодли чеклар берилиши шартлигини билиб олдим. Оиламиз жуда қизиқувчан – кўплаб ютуқли ўйинларда иштирок этамиз ва тез-тез ғолиб бўламиз. Ютуқли чек ўйинлари ҳеч қандай ортиқча харажатларни талаб этмайди, харид учун берилган чекларни рўйхатдан ўтказиш кифоя. Велосипед қизимнинг янги дўсти бўлади. Бу биз каби спортсевар оила учун энг яхши совға. 

Фарход Юсупов, (кир ювиш машинаси соҳиби): 

– Ўйинда илк бор қатнашяпман. Ютуқли чек ўйинлари ҳақида аввалроқ билмаганимдан афсусдаман. Шунга қарамай, соврин ютишга умид қилиб элликка яқин чекни рўйхатдан ўтказдим. Ишончим комилки, бундай акциялар истеъмолчиларни чекларни талаб қилишга ўргатади ва корхоналарни қонунларга риоя қилишга ундайди.

Ютуқли чек ўйинларини ўтказиш ҳақидаги низомга мувофиқ, совринни олиш учун ютуқ чиққан чекнинг аслини, яроқсиз бўлмаган ҳолатда тақдим этиши лозим. Шу боис, III тиражда Chevrolet Nexia 3 автомашинасини ютиб олган истеъмолчи ўйин шартларини бажармаганлиги, яъни рўйхатдан ўтказилган чекнинг аслини тақдим эта олмаганлиги сабабли, супер ютуқ ўйин ташкилотчисида қолдирилди.

Эслатиб ўтамиз: ҳозирда ютуқли чек ўйинларининг IV тиражи учун чекларни рўйхатдан ўтказиш давом этмоқда. 

 Тақдирлаш маросимидан фотогалерея

ДСҚ Матбуот хизмати