Ўзбекистон Республикаси Солиқ қўмитаси

Қувончли хабарлар манзилига етказилди

23/07/2020

“ДСҚнинг 2020 йил 22 июлда ўтказилган ютуқли ўйини 1-тиражда ...(ғолиб исми фамилияси)нинг 574430192454 фискал белгили чеки Chevrolet Nexia 3 соҳиби деб топилди.” Бугун Давлат солиқ қўмитаси ютуқли чек ўйинларининг биринчи тиражи ғолибларига айни мазмундаги SMS хабарномалар юборилди.

Аввал хабар берганимиздек, 22 июль куни ютуқли чек ўйинларининг биринчи тиражи бўлиб ўтди. Унда Тошкент шаҳридаги савдо ва хизмат кўрсатиш нуқталарига ўрнатилган онлайн НКМ ва виртуал кассаларнинг 10 мингга яқин рўйхатдан ўтказилган чеклари иштирок этди.

Ўйин ўша куни 16:00 дан 17:00 га қадар MY5 – “Mening yurtim” телеканалида трансляция қилинди.

Очиқ ва шаффоф тарзда ўтказилган биринчи тиражда 20 нафар ғолиб аниқланди. Ютуқли чек ўйинларини ўтказиш ҳақидаги низомга мувофиқ бугун барча соврин соҳиблари расман хабардор этилди. Уларнинг телефон рақамларига ғолиб бўлганлиги ҳақида SMS хабарнома юборилди. Улар ютуқли чекларни ташкилочиларга тақдим этган ҳолда ўз совринларини олишлари мумкин.

Эслатиб ўтамиз, яроқсиз – йиртилган, ёзувлари ўчиб кетган, чизилган чеклар ва унинг нусхаси ҳақиқий ҳисобланмайди ва соврин олишга асос бўлмайди.

Маълумот учун, 22 июлдан бошлаб Тошкент шаҳрида берилган ва рўйхатдан ўтказилган QR кодли чеклар иккинчи тиражда ўйналади. Кейинги тираж ўйинлари ўтказилиш санаси ДСҚ расмий манбалари орқали маълум қилинади.

Сиз ҳам чек талаб қилинг ва SOLIQ мобил иловасида ёки унинг фискал белгисини 1077 рақамига SMS тарзда юбориб рўйхатдан ўтказинг. Ютуқли чек ўйинларида иштирок этиб асосий соврин – Chevrolet Nexia 3 соҳиби бўлинг.

Омад сизга ҳамиша ёр бўлсин!

ДСҚ матбуот хизмати