O'zbekiston Respublikasi Soliq qo'mitasi

Саволларга жавоб берилиб, тадбиркорларнинг таклифлари тингланди.

15/01/2020

Самарқанд шаҳридаги Ёшлар марказида Ўзбекистон Республикаси Давлат солиқ қўмитаси раиси Бехзод Мусаев иштирокида семинар ўтказилди.

Кўргазмали тарзда ташкил этилган семинарда Ўзбекистон Республикаси Савдо-саноат палатаси раиси ўринбосари Жаҳонгир Мамажонов, Давлат солиқ қўмитаси масъул ходимлари, вилоятда фаолият юритаётган тадбиркорлик субъектлари раҳбарлари, ҳисобчилари, якка тартибдаги тадбиркорлар иштирок этди.

Таъкидлаш лозимки, семинар савол-жавобларга бой бўлди. Солиқ қонунчилигидаги янгиликлар махсус кўргазмали воситалар, видеороликлар орқали тушунтириб берилди.

- Бу каби семинарлар биз учун жуда фойдали – дейди тадбиркор Мурод Хушвақтов. Ўзгаришлар тўғрисида малакали мутахассислар маълумот беришди. Якка тартибдаги тадбиркорлар томонидан айланмадан солиқ тўлаш тартибидаги ўзимни қизиқтирган барча саволларга жавоб олдим.

Шунингдек, Давлат солиқ қўмитаси раиси самарқанд шаҳрида фаолият юритаётган “Samarkand Euro asia textle Asia”масъулияти чекланган жамияти ва “Tuft and grass” қўшма корхоналарида бўлиб, ишлаб чиқариш жараёни билан танишди. Корхоналарнинг раҳбарлари ва бош ҳисобчилари билан янги таҳрирдаги Солиқ кодекси мазмун-моҳияти, солиқ қонунчилигидаги ўзгаришлар ҳақида суҳбатлашди. Берилган саволларга жавоб бериш билан бирга тадбиркорларнинг таклифларини тинглади.

Электрон ҳисобварақ-фактурадан фойдаланиш орқали ортиқча қоғозбозликлар камаяди - дейди “Tuft and grass” қўшма корхонаси бош ҳисобчиси Умид Солиев. Ҳисобварақ-фактурада йўл қўйилиши мумкин бўлган турли хатоликларнинг олди олинади. Электрон ҳисобварақ-фактуралар маҳсулотларимиз қаерда яхши сотилаётганлигини, қайси маҳсулотга талаб юқорилигини мониторинг қилиш имконини ҳам беради.