Сир эмаски, ҳар биримиз маҳсулот харид қилганда ёки бирон хизматдан фойдаланганда тўлов учун харид чекини олишни унутамиз. Аниқроғи тўлов чеки берилмаслигига ўрганиб қолганмиз. Тан олиш керак, истеъмолчилар бундай масалаларга ёлғиз ечим топиши деярли имконсиз. Яширин иқтисодиётнинг шу ва бошқа турларига чек қўйишда давлат солиқ қўмитаси томонидан ишга туширилган “Soliq hamkor” («Налоговый партнер») ахборот тизими қўл келади.

Янги тизим фуқароларни Давлат солиқ хизмати органлари билан ҳамкорликка чорлайди.

Ҳамкор мазкур тизим орқали солиқ тўловчи, солиқ агенти ёки бошқа шахснинг Солиқ кодексида жавобгарлик белгиланган ҳаракати ёки ҳаракатсизлиги юзасидан Давлат солиқ хизмати органини хабардор этади.

Тақдим этилган маълумот аниқ, тўлиқ ва ишончли бўлиши ҳамкор олдидаги энг асосий талабдир.

Тизим бир неча йўналишда масофавий ҳамкорликни таклиф этади:

·  @soliq_hamkor_bot – телеграм-боти;

· my.soliq.uz (https://my.soliq.uz) – электрон солиқ хизматлари портали;

· “Soliq hamkori” – Soliq  мобил иловаси бўлими.

“Soliq hamkor”нинг афзаллиги шундаки, ҳар бир фуқаро ўз хабари ҳолатини реал вақт режимида кузатиб бориши мумкин.

“Soliq hamkor” ахборот тизими орқали қуйидаги солиқ ҳуқуқбузарликлари ҳақида хабар бериш мумкин:

- маҳсулот ёки хизмат учун тўлов қилинганда чек тақдим этмаслик;

- тўлов терминаллари орқали савдо қилишни рад этиш ёки нархларни ошириш;

- яроқлилик муддати ўтган маҳсулотларни сотиш;

 - акциз маркасиз спиртли ва тамаки маҳсулотларини сотиш;

- сифат сертификати бўлмаган маҳсулотларни сотиш;

- ноқонуний тадбиркорлик фаолияти билан шуғулланиш;

- Бўстонлиқ туманида кўчмас мулкни Orom.uz платформасига киритмасдан дам олувчиларга ижарага бериш

“Soliq hamkor” эффекти рақамларда:

Солиқ органларига 2020 йил 22 сентябрь ҳолатига истеъмолчилар томонидан турли солиқ ҳуқубузарликлари бўйича 700 га яқин хабар берилган.

Солиқ ҳамкор ахборот тизими орқали хабар беришда Тошкент шаҳри (208 та), Қашқадарё вилояти (101та), Самарқанд вилояти (55 та), Тошкент вилояти (54 та) ва Фарғона вилояти (46 та) аҳолиси нисбатан фаоллик кўрсатмоқда.

Сирдарё вилояти (9та), Навоий вилояти (14 та), Наманган вилояти (20 та), Бухоро вилояти (21 та) ва Жиззах вилояти (22 та) аҳолисидан эса бошқа ҳудудларга нисбатан камроқ хабарлар йўлланган.

Айни пайтга қадар келиб тушган мурожаатлар бўйича 125 та текшириш ўтказилди, 88 та мурожаат рад этилган ва 140 таси ўрганиш жараёнида.

ДСҚ Матбуот хизмати