Давлат солиқ қўмитаси қонунларни ҳурмат қилувчи фуқароларни ҳамкорликка чорлайди. Энди жисмоний ва юридик шахслар солиқ органларига солиқ соҳасига оид ҳуқуқбузарликлар тўғрисида хабарлар юбориши мумкин. Бунинг учун яширин иқтисодиётга қарши курашда жамоатчилик назоратининг муҳим воситаси – «Soliq hamkor» («Налоговый партнер») ахборот тизими ишлаб чиқилган.

Хабарлар қандай юборилади?

Тизим бир неча йўналишда масофавий ҳамкорликни таклиф этади:

– SOLIQ  мобил иловаси – «Soliq hamkor» бўлими; 

– tekshiruv.soliq.uz платформаси; 

– @soliq_hamkor_bot – телеграм-боти.

Шунингдек ДСҚ ишонч телефони (71) 244-98-98), Call-маркази (1198) ёки org@soliq.uz электрон почта манзили орқали фуқароларнинг ёзма ва оғзаки мурожаатлари қабул қилинади.

Қандай солиқ ҳуқуқбузарликлари ҳақида хабар бериш мумкин?

«Soliq hamkor» тизимида давлат солиқ органлари қуйидаги ҳуқуқбузарликларни кўриб чиқади:

«Харид чеки бермаслик», «Банк пластик картаси орқали тўлов қабул қилишни рад этиш», «Пластик картада тўлов қилинганда маҳсулотни қимматроқ сотиш» ва «Ноқонуний фаолият юритиш».

Барча хабарлар Давлат солиқ қўмитаси томонидан алоҳида назоратга олинади. Юборилган маълумотлар қабул қилинганлиги, кўриб чиқиш жараёни, якуний натижаси ёки рад этилганлиги бўйича мурожаатчига SMS кўринишида ахборот берилади. 

Фактлар ва деталлар муҳим аҳамиятга эга

Қоидабузарлик тўғрисида хабар бериш учун «Soliq hamkor» («Налоговый партнер») тизимида рўйхатдан ўтиш лозим. Хабарда фактларни батафсил баён этиш ва қуйидагиларни кўрсатиш керак: ҳуқуқбузарлик тури, хўжалик субъекти (масалан, дорихона, АЁҚШ, дўкон ва бошқалар), савдо нуқтаси жойлашган жойи ёки аниқ манзили. Хабарга қўшимча тарзда фото ёки видеофайл ҳам бириктириб юбориш мумкин.

Муҳим: ҳар бир янги хабар юборилганда фойдаланувчи телефон рақамини қайта киритиши лозим. Бу солиқ органлари ходимлари мурожаатчи билан боғланиб вазиятга аниқлик киритиш ва мурожаат ҳолати ҳақида хабардор қилиб бориши учун талаб этилади.

 Маълумот учун:  

Тадбиркорлар нималарни билиши керак?

«Soliq hamkor» ахборот тизими орқали келиб тушган мурожаатлар сайёр солиқ текшируви ўтказиш учун асос бўлади. Мурожаатлар асосида текширув тайинлаш тўғрисидаги буйруқ QR код билан тасдиқланади. Тадбиркор QR кодни сканер қилиш орқали буйруқнинг ҳақиқийлигини текшириши мумкин.

Агар буйруқда QR код мавжуд бўлмаса ёки у сохта бўлса Давлат солиқ қўмитасининг (71) 244-97-59 рақамли «ишонч телефони»га мурожаат қилинг.

Ҳурматли фуқаролар солиққа оид ҳуқуқбузарликни гувоҳи бўлдингизми, ўзингизга қулай шаклда хабар юборинг.

Бефарқ бўлманг!