2021-yilning 6-dekabr kuni Davlat soliq qo‘mitasi raisi Sherzod Kudbiyev boshchiligida O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil Dilmurod Qosimov, Oliy Majlis Qonunchilik palatasi deputatlari va OAV vakillari ishtirokida davra suhbati tashkil etildi.

Muhokamada axborot-tahliliy tizimlar va xizmatlarni bosqichma-bosqich joriy etish orqali soliq maʼmuriyatchiligi samaradorligini oshirish masalalari ko‘rib chiqildi. Xususan, mutaxassislar soliq to‘lovchilarni QQS to‘lovchisi sifatida ro‘yxatdan o‘tkazishning yangi tartibi va korxonalarning soliq xavfi darajasi bo‘yicha tahlil qilinayotgan mezonlar haqida atroflicha to‘xtalib o‘tdi. “Mening holatimni tekshirish” interfeysini davlat organlarining axborot bazalari bilan integratsiyalashuvi aniq misollar yordamida tushuntirib berildi. Shuningdek, Vazirlar Mahkamasining 2021-yil 22-sentabrdagi 595-son qarori rasmiy eʼlon qilingan kundan uch oy o‘tgandan so‘ng, yaʼni 2021-yil 23-dekabrdan kuchga kirishi belgilab qo‘yilganligi va soliq to‘lovchilar ushbu interaktiv xizmat yordamida kamchiliklarini aniqlab, qaror kuchga kirgunga qadar ularni tuzatishlari mumkinligi taʼkidlandi. Soliq xavfining yuqori darajasi aksariyat hollarda qaysi mezonlarda aniqlanayotganligi haqida statistik maʼlumotlar berildi. Bir-biriga bog‘langan platformalar DSQ rasmiy manbalariga kelib tushgan muammo hamda murojaatlarga yechim topish va soliqqa oid huquqbuzarliklarni tezkorlik bilan aniqlash imkonini berayotgani  taʼkidlandi.

Shuningdek, uchrashuv doirasida ko‘chmas mulk ijara shartnomalarini ro‘yxatdan o‘tkazish xizmati – “E-ijara”, “E-imtiyoz” va “E-aktiv” avtomatlashtirilgan axborot tizimlarining ishlash tamoyillari tushuntirildi. Mutaxassislar “E-aktiv” AATning maqsadi oddiy va minimal funksiyalar yordamida yuqori likvidli tovarlar kirim-chiqimlari va qoldiqlari hisobini aniq yuritish ekanligini qayd etdi. Bunda QQS to‘lovchilar va ustav jamg‘armasida davlat ulushi 50 foizdan ko‘p bo‘lgan yuridik shaxslar “E-aktiv” AATdan majburiy foydalanishi nazarda tutilgan. Tizimni ishga tushirishning dastlabki bosqichida aksariyat operatsiyalar elektron hisobvaraq-fakturalar va bojxona yuk deklaratsiyasi asosida avtomatik tarzda amalga oshiriladi.

Tadbir ishtirokchilari muhokamada faol ishtirok etib, bir qator qiziqarli savollar bilan murojaat qildi. Davra suhbati yakunlari bo‘yicha raqamli texnologiyalarni yana-da takomillashtirish bo‘yicha tavsiya va takliflar ishlab chiqildi.