✍️“Soliq ma'muriyatchiligi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonun Prezident tomonidan imzolandi. (O‘RQ–758, 11.03.2022 y.) 

Qonun bilan 3 ta kodeks (Jinoyat, Soliq, Ma'muriy javobgarlik to‘g‘risidagi kodeks) va 2 ta qonunga (“Valyutani tartibga solish to‘g‘risida” va “Davlat soliq xizmati to‘g‘risida”) quyidagi o‘zgartish va qo‘shimchalar kiritildi.

📙Valyutani tartibga solish to‘g‘risidagi Qonunga quyidagi o‘zgartish va qo‘shimchalar kiritildi.

🔹Xorijiy valyutadagi tushumni kechiktirish holati uchun qo‘llaniladigan jarima miqdori 2 baravarga kamaytirilgan holda “Valyutani tartibga solish to‘g‘risida”gi Qonunga o‘tkazildi.

📘Soliq kodeksiga quyidagi o‘zgartish va qo‘shimchalar kiritildi.

🔹Soliq organlari tomonidan mol-mulkni xatlash va hududni (binolar) ko‘zdan kechirish jarayonlarida uzluksiz va ketma-ketlikda videotasvirga olish orqali xolislikni ta’minlash tizimi joriy etildi. 

🔹Soliq nazoratini amalga oshirishga doir harakatlarning xolisligi videotasvirga olish qurilmalaridan foydalanish vositasida amalga oshirilishi belgilandi. 

Mazkur o‘zgartirishlardan maqsad – xolislarning hayoti va sog‘ligiga xavf tug‘dirishi mumkin bo‘lgan, shuningdek, xotira susayishi va vaqt o‘tishi bilan guvohi bo‘lingan asl holat bo‘yicha ma’lumotlarning yoddan ko‘tarilishi kabi inson omili bilan bog‘liq holatlarning oldini olish hamda obyektivlikni ta’minlash. Bunda soliq tekshiruvlarida:

▪️ videotasvirni yozib olish to‘xtovsiz va izchil ravishda olib borilishi;

▪️ videotasvir materiallarining ko‘chirma nusxasi soliq to‘lovchiga taqdim etilishi;

▪️ videoyozuv taqiqlangan yoki videoyozuvga olish imkoniyati mavjud bo‘lmaganda xolislar majburiy tartibda jalb etilishi belgilandi. 

📗Ma'muriy javobgarlik to‘g‘risidagi kodeksga quyidagi o‘zgartish va qo‘shimchalar kiritildi

🔹Soliq ma'murchiligini amalga oshirishda inson omilini cheklash va korrupsion holatlarni oldini olish maqsadida quyidagi ma'muriy huquqbuzarliklar bo‘yicha ish yuritishning avtomatlashtirilgan tizimini joriy etish va ular bo‘yicha ishlarni ko‘rib chiqish vakolatini sudlardan soliq organlariga o‘tkazish belgilandi:

▪️soliq hisobotlarini o‘z vaqtida taqdim etmaslik;

▪️soliq va yig‘imlarni to‘lash uchun to‘lov topshiriqnomasini bankka taqdim etmaslik.

 👆moliyaviy sanksiya qo‘llash bekor qilingan. 

🔹Quyidagi holatlar uchun ma'muriy javobgarlik choralari bekor qilindi: 

▪️ budjetga to‘lovlar bo‘yicha qarzi bo‘lgan korxonalarga o‘z vaqtida inkasso topshiriqnomasini taqdim etmaslik;

▪️debitorlik va kreditorlik qarz muddatlarini o‘tkazib yuborganlik;

▪️kassa operatsiyalarini yuritish tartibini buzganlik.

🔹Insofli soliq to‘lovchilar huquqlarini himoya qilish, tadbirkorlarga teng raqobat muhitini yaratish, iste'molchilarning huquqlarini ishonchli himoya qilinishini ta’minlash va sifatsiz mahsulotlarning ishlab chiqilishi va sotilishining oldini olish, hamda yashirin iqtisodiyotga samarali qarshi kurashish maqsadida: 

▫️soliqlar to‘lashdan bo‘yin tovlaganlik; 

▫️to‘lov intizomi va  savdo yoki xizmat ko‘rsatish qoidalarini buzganlik: 

▫️soliq obyektlarini va xodimlar sonini yashirganlik: 

▫️fiskal belgilarni aks ettirmaganlik; 

▫️o‘lchov vositalari bilan jihozlash bo‘yicha qonunchilik hujjatlarida belgilangan talab va tartibga rioya etmaganlik;

▫️majburiy raqamli markirovka qilinadigan (jumladan alkogol, tamaki va pivo) mahsulotlarining qonunchilikda belgilangan qoidalarini buzganlik uchun javobgarlik choralari kuchaytildi.

🔹Soliq ma'murchiligini yanada raqamlashtirish va soliq to‘lovchilarga sifatli xizmat ko‘rsatish maqsadida soliq organlarining axborot tizimlariga integratsiya qilish va axborot taqdim etishning qonunchilikda belgilangan talab va tartibiga rioya etmaganlik uchun davlat organlari va tashkilotlari hamda ularning mansabdor shaxslariga javobgarlik choralari belgilandi.

– Soliqqa oid munosabatlarni tartibga solishga qaratilgan qator idoraviy normativ-huquqiy hujjatlarni yuridik kuchi yuqori bo‘lgan Vazirlar Mahkamasi qarorlari bilan tartibga solinishi qonun bilan mustahkamlandi.