Yangi Soliq mobil ilovasining "Soliq biznes" xizmati bilan — biznes jarayonlaridan tunu-kun xabardor bo‘ling.

Soliq mobil ilovasi foydalanuvchilari e’tiboriga ilovaning yangilangan 2.0.0 versiyasini taqdim etamiz. Endi ilovada tadbirkorlar uchun "Soliq biznes" xizmati qo‘shildi. 

"Soliq Biznes" xizmati soliq to‘lovchi my3.soliq.uz shaxsiy kabinetining ixchamlashgan shakli. 

"Soliq Biznes" xizmatidan foydalanish uchun korxona rahbari va bosh hisobchisi Face ID orqali ro‘yxatdan o‘tadi. 

Xizmatning birinchi sahifasida korxona nomi, soliq to‘lovchining identifikatsiya raqami, korxona barqarorlik reytingidagi o‘rni hamda soliq majburiyatlarining bajarilgan yoki bajarilmaganlik holati ko‘rinadi. 

Keyingi bo‘lim – korxonaning iqtisodiy faoliyatiga tegishli asosiy savollar va ma’lumotlarni o‘z ichiga oladi. Ular tadbirkorning “DSB ma’murchiligi” va “Mahallabay” ishlash tizimidagi mezonlari asosida aks ettiriladi. 

Misol uchun soliq hisobotlarining o‘z vaqtida taqdim etilganligini onlayn kuzatish, hisoblangan soliqlar va yig‘imlar bo‘yicha qarzdorlik mavjud yoki mavjud emasligini ko‘rish mumkin. Shuningdek, bank hisobraqamlarining to‘xtatilgan yoki to‘xtatilmaganligi, yuborilgan va kelib tushgan elektron hisobvaraq-faktura, elektron ishonchnoma va elektron shartnomalarning har bir holati aks ettirilgan. Bunda hisobraqam to‘xtatilish sababi ham ko‘rsatiladi. Misol uchun, soliq hisobotlarini o‘z vaqtida taqdim etmaslik, kameral soliq tekshiruvi natijalari bo‘yicha talabnomaga javob bermaslik, soliq to‘lovchi o‘zi ko‘rsatgan manzilda bo‘lmasligi...

Endi elektron tovar transport yuk xatlarini shakllantirish va qabul qilishni 2 yoki 3 klikda amalga oshirish mumkin. Eng asosiysi bunda tovar transport yuk xatini haydovchi tomonidan tasdiqlash talab etilmaydi. 

Shaxsiy kabinetga yuborilgan talabnoma va boshqa yozishmalarni alohida kichik bo‘limda joylashtirilishi tadbirkorlar uchun yana bir qulaylik bo‘ldi. Ularga bu yerdan soliq organiga murojaat yuborish imkoniyati ham yaratildi.  

Biznes jarayonlarini va buxgalterlar faoliyatini korxona rahbari bilan bir paytda ta’sischilar, biznes hamkorlar va boshqa ishonchli shaxslar ham kuzatib borishi mumkin. Buning uchun korxona rahbari kuzatuvchi rejimini faollashtirishi kifoya.  

"Soliq Biznes" xizmati sizga biriktirilgan soliq inspektori bilan to‘g‘ridan-to‘g‘ri aloqa o‘rnatishga imkon beradi. Bunda ko‘rsatilgan xizmatga salbiy yoki ijobiy baho berishingiz mumkin.  

"Soliq Biznes" sizning qulay va tezkor xizmatingiz.