O‘zbekiston Respublikasi Vazirlar Mahkamasi huzuridagi Soliq qo‘mitasi

Soliq qo‘mitasi huzuridagi Jamoatchilik kengashi a’zolari tadbirkorlar reytingini aniqlash bo‘yicha o‘z takliflarini berdi

06/06/2024

2024-yil 6-iyun kuni Soliq qo‘mitasi huzuridagi Jamoatchilik kengashining navbatdagi yig‘ilishi onlayn tarzda bo‘lib o‘tdi.

Kun tartibida ikkita dolzarb masala – tadbirkorlarning barqarorlik reytingini shakllantirish amaliyotini tahlil qilish va tovar (xizmat)larning bozor narxlaridan kelib chiqib soliq bazasini aniqlash toʻgʻrisidagi nizom loyihasi ko‘rib chiqildi.

Mutaxassislar barqarorlik reytingi joriy etilganidan so‘ng tadbirkorlik subyektlari faoliyatida ijobiy o‘zgarishlar ro‘y berganini qayd etib, qayta ko‘rib chiqishni talab qiluvchi ayrim mezonlar yuzasidan fikr almashdilar. Xususan, "EBITDA rentabellik darajasi" va "Ish haqi fondini baholash" ko'rsatkichlari va boshqa bir qator reytingni pasaytiruvchi mezonlar bo‘yicha fikrlar bildirildi. Yigʻilishda tadbirkorlik subyektlarining holatiga emas, balki ularning xatti-harakatlariga qarab baho berish muhim ekanligi qayd etildi.

regulation.gov.uz portalida e’lon qilingan “Tovarlarning (xizmatlarning) bozor narxlaridan kelib chiqib soliq bazasini aniqlash orqali teng raqobat muhitini yaratish toʻgʻrisida nizom” loyihasi keng jamoatchilik o‘rtasida qizg‘in muhokamalarga sabab bo‘ldi. Portalda mazkur me’yoriy hujjatning ochiq muhokamasiga 253 ta taklif kiritilgan. Jamoatchilik kengashi a’zolari ham hujjatga turli xil yo‘nalishlarda – hujjatni qayta ishlash zaruratidan tortib, to uni Soliq qo‘mitasining ichki hujjati sifatida qoldirish bo‘yicha o‘z taklif va munosabatlarini bildirishdi. Aksariyat ishtirokchilar hujjatni qayta ishlash kerakligini ta’kidladilar. Shunday qilib, tartibga solinadigan tovarlar va xizmatlarning aniq ro‘yxatini belgilash, tovarlar (xizmatlar)ning bozor qiymatini har bir hudud uchun alohida shakllantirish va boshqa o‘zgartirishlar kiritish taklif etildi. Nizom loyihasini muhokama qilish Jamoatchilik kengashining navbatdagi yig‘ilishida davom ettiriladi.

Soliq qo‘mitasi Matbuot xizmati