Ayni damda Soliq qoʻmitasi Raisi Sherzod Kudbiyev Bishkek shahrida MDHga aʼzo davlatlarning soliq xizmati rahbarlari muvofiqlashtiruv Kengashining (SXRMK) navbatdagi XXXI yigʻilishida ishtirok etmoqda.

Tadbirda Kengash tomonidan QQS summasining oʻrnini qoplash va QQS maʼmuriyatchiligida toʻlovning shaffofligini taʼminlashdagi raqamli yechimlar muhokama qilinyapti.

Oʻzbekistonning QQS maʼmuriyatchiligida raqamli yechimlarni joriy etish tajribasi

QQS ma'muriyatchiligida raqamli yechimlarning joriy etilishi soliq tizimining shaffofligini oshirish, soliqqa oid huquqbuzarliklarga qarshi kurashish, biznesda vaqt va resurslar tejalishiga ijobiy taʻsir koʻrsatmoqda.

Elektron hisobvaraq-faktura tizimini joriy etish natijasida soliq solinadigan tovar aylanmasi 2019-yilga nisbatan 6 barobar oshdi. Birgina qogʻozdan 10 milliard soʻm iqtisod qilindi. Hisob-kitoblarga koʻra, tejalgan vaqt 14 ming soatdan koʻproqni (yoki 1,5 yildan ortiq) tashkil etadi.

QQS guvohnomasi soliq toʻlovchini 13 ta xavf mezonlari boʻyicha avtomatik tarzda tekshirilgandan soʻng 7 kun ichida beriladi. Majburiy ravishda QQS toʻlovchisi sifatida eʼtirof etiladigan tadbirkorlik subyektlariga QQS guvohnomasi soliq xavfi darajasiga aniqlik kiritilmasdan avtomatik ravishda beriladi. Bir yil ichida QQS toʻlovchilar soni 188,5 mingdan 197,8 mingtaga koʻpayib, salkam 5 foizga oʻsdi.

QQSni qaytarish uchun soliq hisobotini topshirish paytida ariza berish mumkin. Toʻlovlarni qaytarish muddati 60 kundan 30 kunga qisqartirildi, ayrim toifadagi soliq toʻlovchilar uchun - QQS 7 kun ichida tezlashtirilgan tarzda qaytariladi. Barqarorlik reytingi (AAA) yuqori boʻlgan tadbirkorlar uchun QQS 1 kun ichida tekshiruvlarsiz qaytariladi, bu umumiy qaytarilgan toʻlovlarning 18 foizini tashkil etadi.

Uchrashuv davomida Soliq qoʻmitasi raisi Sherzod Kudbiyevga Qozogʻiston Respublikasi Moliya vazirligi Davlat daromadlari qoʻmitasining oʻn yilligi munosabati bilan ko'krak nishoni topshirildi.

MDH mamlakatlari oʻrtasidagi doʻstona munosabatlar yaqin iqtisodiy hamkorlik va biznesni rivojlantirishga qaratilgan tashabbuslarni ishlab chiqish uchun asos boʻlib xizmat qilayotganini alohida taʻkidlash joiz.

Muvofiqlashtiruvchi kengash soliq maʻmuriyatchiligi sohasida samarali hamkorlik qilish uchun muhim platformaga aylandi. Ilgʻor tajriba almashish tufayli tadbirkorlikni qoʻllab-quvvatlashning yagona mexanizmlari ishlab chiqilmoqda, zamonaviy raqamli xizmatlar va servislar joriy etilmoqda, bu esa tadbirkorlar uchun qulay biznes muhitini yaratmoqda.

Bunday oʻzaro hamkorlikning asosiy yoʻnalishlaridan biri soliq qonunchiligini takomillashtirish va buning natijasida tadbirkorlik erkin rivojlanishi, soliq organlari qonunchilikka rioya etilishi ustidan samarali nazorat olib borishi mumkin boʻlgan makonni yaratishdan iborat. Amalga oshirilayotgan yechimlar biznes yuritishni osonlashtiribgina qolmay, balki mamlakatlarimiz budjetlariga soliq tushumlarini oshirishga ham xizmat qilmoqda.

Doʻstona munosabatlarning mustahkamlanishi yanada yuksalish va farovonlik uchun zamin yaratadi. Birgalikdagi saʻy-harakatlar bugungi kundagi muammolarni yengib oʻtish va iqtisodiyotni muvaffaqiyatli rivojlantirish uchun shart-sharoit yaratishga qaratilgan.